د زابل د شهر صفا ولسوالۍ امنیه قوماندان ووژل شو
د کندهار د والي مطبوعاتي دفتر ازادي راډيو ته وويل چې نن شنبه د غرمې ۱۲ بجې د کندهار ښار د نهمې امنیتي حوزې اړوند، د جادې به سیمه کې د زابل د شهر صفا ولسوالۍ امنیه قوماندان ګل احمد ګرانی د نامعلومو وسله والو په برید کې وژل شوی .
د سرچينې په وينا، په دې برید کې د ګل احمد ګراني یو ساتونکی هم ټپي شوی دی .
د کندهار مطبوعاتي دفتر ازادي راډيو ته زياته کړې چې حمله کوونکي پر موټر سايکل سپاره وو او د پېښې له ځايه تښتېدلي دي .
ګل احمد ګرانی د تېرو څو کلونو را په دېخوا د زابل د شهر صفا ولسوالۍ امنیه قوماندان و چې نن کندهار ته راغلی و او په غلچکي برید کې ووژل شو.
تر اوسه کومې وسله والې ډلې ددې پېښې مسؤلیت نه دی منلی.