په نورستان کې د ورزشي امریت لپاره ودانۍ جوړېږي
په نورستان کې د ورزشي امریت لپاره د درېپوړیزې ودانۍ د بنسټ ډبره کېښودل شوه.
په یاده ودانۍ به ۱۵ اعشاریه ۷ ملیونه افغانۍ لګښت راځي چې په یوه کال کې به يې چارې بشپړې او ګټې اخستنې ته به وسپارل شي.
د نورستان والي حافظ عبدالقیوم د ورزشي امریت د نوې جوړېدونکې ودانۍ دځانګړتیاو په اړه د شنبې په ورځ ازادې راډیو ته وویل:
"د ورزشي امریت د تعمیر د بنسټ ډبره مو نن ورځ کېښوده، په دې تعمیر به ټول ۱۵ اعشاریه ۷ملیونه افغانۍ لګښت راشي، په درېیو پوړونو کې جوړېږي، .۱۱ کاري خونې به ولري او د ښار جوړونې وزارت له خوا يې بودجه ورکول کېږي او د یوه کال په موده کې به يې چارې بشپړې شي."
په نورستان کې دورزې چارو مسؤل حضرت عمر تبسم ازادې راډیو ته وویل، ودانې به جوړه شي، د دوی دفتري ستونزې به هوارې شي، خو تراوسه په ټول ولایت کې د لوبو لپاره کوم معیاري لوبغالی نه لري چې له امله يې لوبغاړي له ستونزو سره مخ دي.
د نورستان والي بیا ډاډ ورکوي چې هڅې يې پیل کړي، څو په ولایت کې يې معیارې لوبغالی جوړ شي.