چارواکي فراه ښار ته د وسلهوالو د ننوتلو مخنيوي ته قوي کمربند جوړوي
د فراه امنيتي چارواکي وايي، فراه ښار ته د وسلهوالو د ننوتلو د مخنيوي لپاره قوي امنيتي کمربند جوړېږي.
طالبانو د تېرې سې شنبې په شپه پر فراه ښار حمله وکړه او د دغې حملې په نتیجه کې یې وکړای شول د څو ساعتونو لپاره د ښار ځینې امنیتي پوستې ونیسي.
د فراه د دوهمې پلې لېوا قوماندان ډګروال ګدا محمد دوست نن جمعه په فراه کې يوه کنفرانس ته وويل:
"دا وار هڅه کوو، داسې کمربند جوړ کړوچې هېڅوک ونه کړاى شي ښار ته داخل شي. له تېرو تجربو مو زدهکړې ده. له نورو امنيتي ارګانونو سره مو هڅه دا ده چې بايد يو قوي کمربند جوړ کړو او دښمن ته کومه خلا پرې نهږدو."
بلخوا د فراه والي وايي، د فراه ښار ټولې هغه سيمې به تصفيه شي چې وسلهوالو طالبانو پهکې نفوذ کړى و.
بصير سالنګي نن جمعه ازادي راډيو ته وويل، په هغو سيمو کې چې د وسلهوالو لاس ته ورغلې وې، امنيتي ځواکونه ځاى پر ځاى شوي دي.
تردې مخکې د فراه د ولايتي شورا ځينو غړو انتقاد کړى و چې د ښار په څنډو کې لا هم وسلهوال شته او د دوى په وړاندې پوځي عمليات ورو مخ ته ځي.