د حامد کرزي په هوايي ډګر کې ۷ تنه د قاچاق په تور نیول شوي
د حامد کرزي په نړیوال هوايي ډګر کې اووه تنه د قاچاقو په تور ونیول شول.
له نشهيي موادو او مسکراتو سره د مبارزې عدلي او قضايي مرکز ویاند خالد مؤحد د چهارشنبې په ورځ ازادي راډیو ته وویل چې دې اوو تنو غوښتل په خپلو خېټو او بکسونو کې څلور کیلو ګرامه هیروئين د حامد کرزي نړیوال هوايي ډګر له لارې هند ته قاچاق کړي چې پولیسو ونیول.
په ورته وخت کې پولیسو په کابل، جوزجان، بلخ او ننګرهار ولایتونو کې د نشهيي موادو د قاچاقو په تور ۱۳ تنه نیولي دي چې څو کیلو ګرامه هیروئين، ۱۱۴ کیلو ګرامه تریاک، ۱۵۷کیلو ګرامه چرس، ۸۱۱ کیلو ګرامه کېمیاوي مواد او ۴۲ ګرامه شیشه يا کرسټال هم ورسره نیول شوي دي.