افغان کرکټ لوبډله له هند سره د لوبې لپاره بنګلور ښار ته ورسېده
د افغانستان د کرکټ ملي لوبډله د هندوستان پر وړاندې د تاریخي ټسټ لوبې په موخه تېره ورځ د دغه هېواد بنګلور ښار ته ورسېده.
ټاکل شوې ده چې د دواړو لوبډلو تر منځ لومړنۍ ټسټ لوبه د روانې جون مېاشتې له ۱۴مې یعنې راتلونکي پنجشنبې ورځې څخه تر ۱۸ نېټې په ایم چیناسوامي لوبغالي کې ترسره شي.
له دې وړاندې افغان لوبغاړي د تېرې نېږدې دوو میاشتو راهیسې په هندوستان کې په تمریناتو بوخت و تر څو د بنګله دېش پر وړاندې شل اوریزو سیالیو او د هندوستان پر وړاندې تاریخي ټیسټ لوبې ته ښه چمتووالی ونیسي.
د افغانستان کرکټ بورډ دا لوبه ځکه تاریخي ګڼلې چې د ټېسټ معیار له اخیستلو وروسته دا لومړی ځل دی چې لوبډله یې له هندوستان سره چې په کرکټ کې خورا زیاته سابقه لري مخ کېږي.