زرګونو کسانو نن د کرويشيا په پلازمېنه زګرب کې مظاهره وکړه
دوى له چارواکو د زورزياتي د پېښو په وړاندې د جدي اقداماتو غوښتنه وکړه.
دغه مظاهرې وروسته له هغې پيل شوې چې په پاګ ټاپو کې يوه پلار خپل څلور ماشومان د څلور منزله ودانۍ له لوړ منزل څخه لاندې واچول.
دغه ماشومان چې عمرونه يې د درېيو او اتو کلونو ترمنځ دي، سخت ټپيان شوي دي.
مظاهره چيانو په ښوونځيو کې د تعليم د کيفيت ښه کولو او د زورزياتي د پېښو په وړاندې د مبارزې لپاره دولتي مامورانو ته د نورې روزنې غوښتنه وکړه.
په پلازمېنه زګرب کې صدراعظم اندري پلين کوويچ چې په مظاهره کې يې برخه درلوده، وويل چې په دې برخه کې اقدام ته چمتو دى.
د روېټرز اژانس په حواله، له ٢٠١٢ څخه تر ٢٠١٧ میلادي کاله پورې ٩٠ ښځې د هغوى د خاوندانو، پخوانيو مېړونو يا دوى ته د نږدې کسانو له خوا وژل شوي دي.