ایراني چارواکو د ایران د ځينو ښارګوټو او کلیو د خالي کولو امر کړی
ایراني چارواکو د دې هېواد په جنوب لوېدیځ کې د نورو هغو ښارګوټو او کلیو د خالي کولو امر کړی چې د سېلابونو له ګواښ سره مخ دي.
په داسې حال کې چې د مارچ له نولسمې نېټې څخه د ایران زیاتې سیمې د درنو ورښتونو شاهدانې وې، د دې هېواد د ۳۱ ولایتونو څخه په ۲۶ ولایتونو کې راوتلو سختو سېلابونو سلګونه کلي او ښارونه ځپلي دي.
په دې سېلابونو کې لږترلږه ۷۰ کسان وژل شوي دي.
خوزستان د تېلو تولیدوونکی ولایت تر نورو زیات سېلابونو ځپلی دی.
د دې ولایت والي غلام میرزا شریعتی د ایرنا دولتي خبري اژانس ته ویلي، شپږ ښارګوټي باید هر څومره ژر چې ممکن وي، خالي شي، ځکه چې حکومت غواړي سیمې ته له یو شمېر نږدې بندونو څخه اوبه خوشې کړي.
شریعتي ویلي، ژغورونکې ډلې د دې ښارګوټو اوسېدونکي نږدې سرپناوو ته انتقالوي.
په ایران کې وروستي سېلابونه په تېره یوه لسیزه کې تر ټولو ناوړه سېلابونه بلل شوي.
په ځینو سیمو کې خلکو قهرجنې مظاهرې کړي او د سېلابونو په وړاندې یې د حکومت د ژغورنې پر هڅو انتقادونه کړي.