تېر کال له ۲۹ میلیونو ډېر ماشومان په جګړه ځپلو هېوادونو کې زېږېدلي

د ملګروملتونو د ماشومانو د ملاتړ صندوق یونیسف وايي چې تېر کال له ۲۹ میلیونو زیات ماشومان د افغانستان، سومالیا، جنوبي سوډان، سوریې او یمن په ګډون د نړۍ په جګړه ځپلو هېوادونو کې زېږېدلي دي.


یونیسف په یوه راپور کې چې نن د سپټمبر په ۲۰مه خپور شو، ویلي چې دا احصائیه ښيي چې تېرکال په هرو پنځو نویو زېږېدلو ماشومانو کې یوه د خپل ژوند لومړۍ میاشتې په داسې شرایطو کې تېرې کړي دي چې د جګړو له کبله ګډوډي پکې وه او چاپېریال یې تر ډېره حده ناامنه او له فشارونو ډک و.


په راپور کې د یونيسف د اجرائیه مشرې هنریتا فور له قوله ویل شوي چې میندې او پلرونه باید وتوانېږي چې خپلو ماشومانو ته د ژوند د لومړیو شېبو تودوخه ورکړي، خو د میلیونونه کورنیو لپاره چې په جګړه ځپلو سیمو کې ژوند کوي، دا حقیقت له امکان څخه لېرې دی.


مېرمن فور ویلي، په ډېرو هېوادونو کې تشدد او جګړې ماشومانو او د هغو میندو او پلرونو ته د اساسي خدماتو د رسولو پر وړاندې ګڼ شمېر خنډونه رامنځته کړي دي.