چارواکي: کاپیسا او پکتیکا کې ۱۱ وسله وال وژل شوي
دا خبره د ملي امنیت ریاست نن رسنیو ته په یوې استولې خبرپاڼه کې کړې.
د خپرپاڼې په وینا په دې عملیاتو کې د وسلوالو یو مرکز هم ویجاړ شوی دی.
په عین حال کې فرا کې د ملي اردو چارواکو دغلته د پنځو وسلوالو طالبانو د وژل کېدو ادعا کړې ده.
په فرا کې د ملي اردو د دویمې لوا ویاند حشمت الله احمدي نن ازادي راډیو ته وویل چې پنځه تنه وسله وال په خاک سفید ولسوالۍ کې په یو هوايي برید کې وژل شوي دي.
د احمدي په وینا دا عملیات لا هم دوام لري.
بل خوا د پکتیکا امنیتي چارواکي وایي، چې د دې ولایت د خوشامند ولسوالۍ اړوند د ډیلې په سیمه کې په وسله والو طالبانو برید شوی، چې په پایله کې کې درې تنه طالب وسله وال وژل شوي.
د پکتیکا د پولیسو ویاند شاه محمد ارین نن سهار ازادي راډيو ته وویل، چې یاد برید د افغان هوایي ځواکونو له لوري پرون مازدیګر مهال ترسره شوی.
وسله والو طالبانو د حکومتي لوري ددې ادعاوو په اړه تر اوسه تبصره نه ده کړې.