د پاکستان حکومت ۲۸ پيلوټان له دندو ليرې کړل
هغه زیاته کړه: ''د چا چې لايسنسونه مشکوک وو، هغو ته د الوتکو د پورته کولو اجازت نشته. په پي ای اې او هوا بازۍ اداره کې د هغه خلکو خلاف هم ګامونه اخیستل پیل شوي چې د پيلوټانو پر جعلي لایسنسونو يې په مبيينه ډول ځان غلی کړی وو. ۲۸ پيلوټان چې لايسنسونه يې جعلي دي، له دندو ليرې کړل شوي دي. د پاتو خلاف د ډيسپلين او مبيينه جرم ترسره کولو د څېړنو کارروايي روانه ده.''
په همدې حال کې اروپا فضا ژغورنې ادارې ۳۲ هېوادونو ته د جولای پر۷مه لېږلي يوه خط کې ويلي چې له پاکستانه لایسنس اخېستونکيو پيلوټانو ته د الوتکو الوزولو اجازت ورنه کړي. دا هر څه تر هغه ورسته مخې ته راغلل چې د مې پر دوه ویشتمه له لاهوره کراچۍ ته روانه د پاکستان هوايي کرښې يا پي ای اې يوه الوتکه وغورځېده او ۹۸ کسان پکې مړه شول. د پاکستان حکومت تحقیقات پېل کړل او د هوابازۍ وزیر غلام سرور خان د جون په ۲۶مه په يوه خبري غونډه کې وويل چې د ۲۶۲ پيلوټانو لایسنسونه په مشکوک ډول جعلي دي.
په پاکستان کې د پيلوټانو اتحاديې پالپا ترمخه په ټول ملک کې فعاله ۸۶۵ پيلوټان موجود دي. دې اتحادیې د حکومت له خوا پر دوی په کراچۍ کې د غورځېدلې الوتکې پړه اچول رد کړي دي. دې اتحاديې د جولای په ۷مه مشال راډيو ته په ليکلي بڼه په رالېږلې خپل موقف کې ويلي چې حکومت د هر څه زور له پيلوټانو وباسي او د هوابازۍ اداره زمه واره نه بولي. يوه پخواني پايلټ ميا شاهد حبیب هم مشال راډيو سره په خبرو کې وويل چې که د پيلوټانو لایسنسونه جعلي وو نو د هوا بازۍ وزارت ته ولې معلومات نه وو.
هغه د جولای په ۷مه، په خپلو خبرو کې د يو پيلوټ د لایسنس اخیستو طریقه کار داسې تشريح کړ. ''که څوک غواړي پايلټ شي نو لومړی بايد ايف ايس سي وکړي. بيا به د پاکستان له څلورو کلبونو څخه يوه ته ورځي او هلته به دوه سوه ګنټې ټريننګ پوره کوي. بيا ترې امتحان اخیستل کېږي. د اتو مضمونونو او عملي پرواز. دا هر څه د هوايي بازۍ اداره کوي. اوس په دې هرڅه کې د هوابازۍ اداره غایبه ده خو زور له پيلوټانو وځي.''
د پيلوټانو د جعلي لایسنسونو له وجې ځينو هېوادونو د پاکستان پر هوايي شرکت يا پي ای اې پروزاونو بندیز لګولی دی. يورپي يونين د جولايي په دوهمه اعلان وکړ چې د مسافرو د خوندي ساتلو لپاره تر شپږ مياشتو پورې د پي ای اې الوتکې نه ورپرېږدي.
د پاکستان د هوابازۍ په اړه د ګڼو تحقیقاتي راپورونو خبريال، افتاب کاکاخېل د جولای په ۷مه مشال راډيو ته وويل چې دې جنجال د پاکستان اقتصاد، د دې صنعت سره د تړلو خلکو روزګار او په نړيواله کچه د دې هېواد حیثیت ته سخت زیان ورساوه. ''په هفته کې به يورپ ته ۲۳ پروازونه کېدل. هغه به اوس نه کېږي. زموږ پيلوټان په نورو هوايي کرښو کې هم وو. انجنيران هم شته دي. دې ټولو ته اوس د شک په سترګه کتل کېږي.''
د جولايي په ۷مه نېټه د پيلوټانو نړيوالې اتحاديې د پاکستان وزیراعظم عمران خان ته يو خط لېږلی دی چې پکې يې د پاکستاني حکومت له خوا له پيلوټانو څخه روانو تحقیقاتو په اړه اندېښنې ښودلې دي. مشال راډيو ته په رسېدلي دې خط کې له وزیراعظمه غوښتل شوي چې دغه نړيواله اتحاديه غواړي چې د شفافیت لپاره د دې څېړنو برخه شي.