هېواد: د سولې لپاره له هڅو سره جوخته جګړه د منلو نهده
مسیر
مسیر ورځپاڼې د سولې په خبرو اترو کې د ځنډ موضوع را اخیستې لیکلي چې د بینالافغاني خبرو لپاره پر اصولو او کړنلاره بحث دوهمې اوونۍ ته غځېدلی او لا هم اختلافي مسایل نهدي حل شوي.
د سرمقاله لیکونکي په باور، داسې ښکاري چې پر اصولو او کړنلاره بحث به ډېر وخت ونیسي او بیا به ورپسې پر اجنډا هم بحث لانجمن او اختلافي وي او دواړه اړخونه به ژر پایلې ته ونهرسېږي.
ورځپاڼې د خبرو د ځنډېدو لامل د ذهنیتونو او دریځونو ستونزه بللې او لیکي چې طالبان لا هم سولې ته د فتحې په سترګه ګوري او فکر کوي چې د امریکا له ماتې وروسته دوی حکومت هم په سولهییزو خبرو ماتوي او خپلو ټولو یا لویې برخه موخو ته رسېږي او له همدې امله طالبان قربانۍ او یا له خپلو خبرو څخه تېرېدنې ته لږ او یا هم بېخي نهحاضرېږي.
ورځپاڼې اندېښنه ښودلې چې په دې ذهنیت چې دواړه اړخونهیې لري، سوله ناشونې کېږي چې یا خو به یو لوری یو مخ له خپل دریځ څخه تېرېږي او یا به هم دواړه لوري څو ګامه مخ ته راځي او له ځینو مسایلو به تېرېږي، څو د خبرو پیل ته لاره هواره شي او بیا بریالۍ شي.
هشت صبح
هشت صبح ورځپاڼې بیا انتقاد کړی چې د سولې د خبرو د ځنډېدو لاملونه او په دې اړه شوي پرمختګونه په دقیق ډول له خلکو سره نه شریک کېږي.
په سرمقاله کې ټينګار شوی چې په دوحه کې د سولې د خبرو اترو پرېکړې باید د افغانستان د ملي ارزښتونو پر بنسټ وي.
ورځپاڼې د خلکو، مدني فعالانو او سیاسیونو هغه اندېښنې را اخیستي چې ویلي د دغې پروسې معلومات پټ ساتل کېږي. وړاندې راغلي چې افغانان په ناوړه وضعیت کې د رایو صندوقونو ته ولاړل او قرباني یې ورکړې چې په وینا یې اوس باید د دوی د قربانیو او سرښندنو قدر وشي او تېرې لاسته راوړنې خوندي شي.
لیکوال لیکلي چې د سولې په خبرو اترو کې هر ډول بدلون چې راځي افغانان باید په جریان کې اوسي او خلکو ته دقیق معلومات ورکړل شي.
هېواد
هېواد دولتي ورځپاڼې د سولې خبرو سره هممهاله د جګړې زیاتېدو ته اشاره کړې لیکلي چې د سولې لپاره له هڅو سره جوخته جګړه د منلو نهده.
ورځپاڼې دا حالت د اندېښنې وړ بللی چې په قطر کې د سولې خبرې روانې دي او له بلې خوا له بېلابېلو ولايتونو د لسګونه ملکيانو او ځينو دولتي چارواکو د وژل کېدو او ټپي کېدو راپورونه ورکول کېږي.
د سرمقاله لیکونکي په باور، په اصل کې د پاکستان په شمول نور دښمن لوري لکه روسيه، ايران او ځينې د پردې تر شا نور دښمن لوري طالبان نهپرېږدي چې د افغانانو له هيلو سره سم د پخلاينې لاره غوره کړي.
ورځپاڼې ادعا کړې چې طالبان په خپل واک نهدي چې يا سوله وکړي او يا هم اوربند، بلکې هغوی د دې لورو تر فشارونو لاندې دي، هر يوه ځانګړې اجنډا ورکړې چې پر بنسټيې له افغان حکومته امتياز ترلاسه کړي.