'تېرو ۶ میاشتو کې د طالبانو خوځښتونه؛ ۷،۰۰۰ حملې او ۳،۵۰۰ ملکیانو ته مرګژوبله'
دا خبره د دغه وزارت ویاند طارق ارین د سې شنبې په ورځ «۱۳۹۹ کال د تلې ۰۱» په کابل کې خبریالانو ته وکړه او ویېویل، په دغو حملو کې نږدې ۳،۵۰۰ ملکي کسانو ته مرګژوبله اوښتې، خو ښاغلي ارین د وژل شویو او ټپیانو کره شمېره ونهویل.
طالبان دغه ادعاوې ردوي.
خو ښاغلی ارین زیاتوي: "د روان کال د حمل له لومړۍ نېټې نه د سنبلې تر ۳۰مې، طالبانو نږدې ۷،۰۰۰ یرغلیز خوځښتونه کړي دي. په خواشینۍ سره په دغو خوځښتونو کې زموږ ملکي خلکو ته درانه تلفات اوښتي چې څه کم ۳،۵۰۰ ملکي کسان پهکې ټپیان او شهیدان شوي دي."
ده وویل د طالبانو په دغو خوځښتونو کې وسلهوالې حملې، د سړک غاړې بمونه، د چاودېدونکوموادو کارول، ترور او داسې نور شامل دي.
ښاغلي ارین دا هم وویل، د هېواد امنیتي او دفاعي ځواکونه فعال دفاعي حالت لري او په دغو نښتو کې یې طالبانو ته هم درانه تلفات اړولي دي.
دا په داسې حال کې ده چې د تېرې اوونۍ د شنبې په ورځ د قطر په پلازمېنه دوحه کې د بینالافغاني خبرو پرانیست غونډه وشوه.
تمه وه چې رسمي خبرې د تېرې اوونۍ د دوشنبې په ورځې پیل شي، خو د غونډې په کړنلارې د بحث لا امله دا خبرې ځنډېدلي او تر اوسه پورې هم بحثونه روان دي.
د افغانستان د سولې لپاره د امریکا ځانګړي استازي زلمي خلیلزاد وړمه شپه پر خپله ټویټرپاڼه د تاتریخوالي پر دوام اندېښنه ښودلې او لیکي: "له تېرو څو ورځو راهیسې په افغانستان کې تاوتریخوالی په څرګند ډول زیات شوی چې دا د تأسف خبره ده، په دې تاوتریخوالو کې ګڼ افغانان وژل کېږي."
ده وړاندې لیکلي، "دې ته په پام چې وروستیو کې د سولې خبرې پيل شوي، نو اړینه ده چې ټول اړخونه په تاوتریخوالي کې د پام وړ کموالی راولي. "
د افغانستان لپاره د ناټو ملکي استازي سټیفانو پونتېکورو هم د سولې نړیوالې ورځې په مناسبت په خپل پیغام کې ویلي، په افغانستان کې د سولې لپاره تاریخي فرصت رامنځته شوی او باید نور تاوتریخوالي ته د سیاسي جوړجاړي له لارې حل لار پیدا شي.
خو د کورنیو چارو وزارت د ویاند په خبره، طالبانو دغو مذاکراتو او د افغان ولس او حکومت هېڅ غوښتنې ته، نهیوازې دا چې مثبت ځواب ونهوایه، بلکې د جګړې اور یې لا تود وساته.
د چارو پوهان وايي، طالبان د دې لپاره چې په دغو مذاکراتو کې امتیاز ترلاسه کړي، غواړي دغه هدف ته د جګړې له لارې ځانونه ورسوي.
پخواني جنرال عتیق اله امرخېل ازادي رادیو ته وویل: "طالبان یا مقابل لوری غواړي چې خپل اهداف د زور، جګړې او تاوتریخوالي له لارې پر نورو ومني او په مذاکراتو کې برلاسی پیدا کړي، د دې لپارهیې جګړې ته زور ورکړی دی. په دغو جګړو کې د جنګ قوانین نهمراعتوي او نه مراعات شوي دي."
خو د طالبانو ویاند ذبیحالله مجاهد ازادي ته په لېږل شوي غږیز پیغام کې د کورنیو چارو وزارت دغه ادعا رد کړه ویېویل، وسلهوالو طالبانو خپل پوځي عملیات کم کړي او دا حکومت دی چې د هېواد په څو ولایتونو کې یې د طالبانو پر ضد عملیات پیل کړي او د ملکي تلفاتو لامل د حکومت هوايي بمبارۍ دي، نه طالبان.
سربېره پر دې د طالبانو او افغان حکومت ترمنځ د مذاکراتو له پیل راهیسې د افغانستان په ډېری ولایتونو کې پر افغان ځواکونو وسلهوالو حملو زور اخیستی چې دواړو ته پهکې مرګژوبله اوړي.
دا په داسې حال کې ده چې د افغانستان ولسمشر محمد اشرف غني او د مصالحې عالي شورا رئیس عبدالله عبدالله تېره ورځ د سولې د نړیوالې ورځې په مناسبت په جوړې شوې غونډه کې پر طالبانو غږ وکړ چې په هېواد کې د سولې د ټینګښت په خاطر د افغان حکومت او افغان ولس غوښتنه ومني.