د احصائیې ملي اداره: الکترونیکي تذکره کې د مور نوم لیکل اختیاري دی
د دې ادارې رئیس احمد جاوېد رسولي نن په کابل کې یوې خبري غونډې ته وویل، له دې وړاندې هم په ډیټابېس یا د معلوماتو په ذخیره کې د مور نوم لیکل کېده، خو اوس د نوي قانون پر بنسټ، د هر شخص د خوښې پر بنسټ، د مور نوم د الکترونیکي تذکرې په لومړۍ صفحه لیکل کېږي.
ښاغلي رسولي زیاته کړه، دوی تر اوسه نږدې یو میلیون الکترونیکي تذکرې وېشلي او دا ټولې با اعتباره یا د باور وړ دي، خو یو شمېر هغه کسان چې له وړاندې یې تذکرې اخیستي، مګر غواړي د مور نوم پهکې ولیکل شي، ژر به هغوی ته د نویو تذکرو د ورکړې بهیر هم پیل شي.
د افغانستان حکومت په وروستیو کې د وګړو د احوال او ثبت په قانون کې د تعدیل پر بنسټ، په الکترونیکي تذکرو کې د مور نوم لیکل تصویب کړل.