سرور دانش: ۱۳ میلیونه افغانان غذایي خوندیتوب نهلري
ښاغلی دانش، د افغانستان خوړو خوندیتوب او تغذیې ملي اجنډا درېیمې کلېزې په مناسبت جوړې شوي غونډه کې وویل، افغانستان کې ۷۰ سلنه خلک د بې وزلۍ تر کرښې لاندې ژوند کوي چې له دې ډلې ۴۴.۶ سلنه یعنې ۱۳ میلیونه خلک غذایي خوندیتوب نه لري.
د ده په وینا له دې شمېر خلکو یې ۹ عشاریه ۶ میلیونه خلک په کلیو او بانډو او پاتې نور ۲ عشاریه ۹ میلیونه خلک یې په ښارونو کې ژوند کوي.
دی وايي: "افغانستان کې د رسمي شمېرو له مخې موږ له جدي ګواښ سره مخ یو. ویل کېږي چې ۱۳ میلیونه خلک د خوړو امنیت نه لري چې له دې ډلې ۸ میلیونه جدي حال کې دي هغه په دې معنی چې نه پوهیږي، د خوړو را روان وخت کې څه وخوري."
افغان حکومت په ۱۳۹۶ کال کې د فقر او بېوزلۍ د ختمولو لپاره هېواد کې د يو شمېر نړیوالو بنسټونو په مرسته د خوړو د خوندیتوب او تغذیې ملي پروګرام پیل کړ ،هغه مهال هېواد کې د فقر کرښې لاندې یوازې ۳۹ سلنه خلکو ژوند کاوه په داسې حال کې چې اوس یې شمېر اویا سلنې ته پورته شوی دی.
افغانستان کې د خوړو خوندیتوب او تغذیې ملي اجنډا په تړاو جوړې شوې غونډه کې د افغان حکومت یو شمېر نورو چارواکو په دې هم نیوکې درلودې چې د خوړو کنټرول برخه کې لا هم کومه ځانګړي اداره کار نهکوي.
خو د کرنې اوبو لګونې او مالدارۍ سرپرست نوماند وزیر انوالحق احدي بیا هېواد کې د خوړو برابرولو او دې برخه کې د خوندیتوب لپاره راتلونکي څو کلونه سرنوشت سازه ګڼي.
ښاغلي احدي وویل، په راتلونکو پنځو کلونو کې به افغانستان هغه زرګونه هکټاره ځمکې چې د جګړو له امله ویجاړې شوې وي ورغول شي او د خوړ برخې کې به ځان بسیاینې ته ورسېږي.
ښاغلي احدي زیاته کړه: "زه اوسمهال داسې ښکاره دلیل نه وینم چې د خوړو نشتون له امله موږ له کومې ستونزې سره مخ شوي اوسو. د افغانستان په ښارونو کې د اړتیا وړ خواړه شته که لېرې پرتو سیمو کې هم کومه ستونزه پیدا شي د دولت له زېرمو کار اخېستل کېږي. "
په ورته وخت کې افغانستان کې د خوړو نړیوال سازمان استازې میري ایلن میک ګروټري وویل، د خوړو نشتون یا د خوندیتوب نه درلودو برخه کې باید ټول یو لاسي شي.
اغلې میک ګروټري زیاته کړه، په دې برخه کې ملګري ملتونه تل افغانستان سره مرسته کړې او خپلو دې ژمنو ته به ادامه ورکوي.