ولسمشر غني: په افغانستان کې دایمي سولې لپاره نړیوالې اجماع ته اړتیا ده
د جنيوا ناستې په لومړۍ ورځ د افغانستان جمهور رئیس محمد اشرف غني د خپلې وینا پر مهال وویل، په افغانستان کې د سولې لپاره یو ښه فرصت ترلاسه شوی او د دې فرصت څخه په استفادې سره باید نړېواله اجماع رامنځته شي.
د ښاغلي غني په خبره دا ډېره مهمه ده.
هغه زیاته کړه: "د نړیوالې ټولنې اجماع د سولې او سیاسي ثبات لپاره ډېره مهمه ده، نړیواله ټولنه باید د ترورېزم سره د مبارزې په برخه کې چې اوس هم یو ستر ګواښ دی همکاري وکړي."
ولسمشر غني وویل، د نړیوالې ټولنې مرستې کولای شي افغانستان په خپلو پښو ودروي، نوموړي په ټنیګار سره وویل: "موږ له نړېوالو نه سوال نه کوو، بلکې دوی سره د وصل غوښتنه کوو."
د افغانستان جمهور رئیس په افغانستان کې مخ پر زیاتېدونکي تاوتریخوالي ته هم اشاره وکړه.
هغه وویل، د افغانانو زغم نور پای ته رسېدلی.
نوموړي زیاته کړه: "د تاوتریخوالي لوړ ګراف د افغانانو له زغمه وتلی، هیله کوم په دې برخه کې همکاري وکړئ، څو دغه حالت ته د پای ټکی کېښودل شي."
ښاغلي غني، د اقتصادي ودې او دغه شان د یو صادرونکي افغانستان د جوړولو لپاره په کنفرانس کې له ټولو هېوادونو د همکارۍ غوښتنه وکړه، هغه وویل چې په تېرو نولسو کلونو کې شوې مرستې بې ګتې نه وې.
نن د جینو کنفرانس لومړي ورځ وه، په دې ناستې کې د افغان چارواکو په ګډون د ټولو ګډونوالو له خوا په درېیو مواردو بحث وشو، سوله، کډوالي او له فساد سره مبارزه.
په ورته وخت کې د افغانستان د بهرنیو چارو وزیر محمد حنیف اتمر بیا د تېرو دوه لسیزو د لاسته راوړنو په خوندیتوب ټینګار وکړ.
د افغانستان ۲۰۲۰ کنفرانس د افغانستان، فنلنډ او ملګرو ملتونو له خوا جوړ شوی چې په کې د نږدې سلو دولتونو او سازمانونو استازو ګډون کړی دی.
د دغه کنفرانس موخه د پراختیايي هدفونو تاکل او له ۲۱۲۱ نه تر ۲۰۲۴ زېږدیز کاله پورې دغه هېواد سره د نړیوالو مرستو راټولول ښودل شوي دي.
تېر ځل په ۲۰۱۶ کال کې نړیوالې ټولنې په بروکسل کې د افغانستان په اړه لویه مرستندویه غونډه کړې وه چې پکې د ۱۵ میلیارد او دوه سوه میلیونه ډالرو مرستو ژمنه وشوه.