الاسکا غونډه کې د امریکایي او چینایي دیپلوماتانو ترمنځ لانجه
له دې سره د واشنګټن هغه هیلې کمزورې شوې چې غوښتل یې د چین چلند کې به بدلون راشي او دې ته به زمینه برابره شي چې د پخواني ولسمشر ډونالډ ټرمپ په وخت چې اړیکې خړپړ شوي وو، هغه بېرته سم شي.
د پنجشنبې په ورځ د دواړو هېوادونو دیپلوماتانو په الاسکا کې د دوه ورځنۍ غونډې په پيل کې لانجه وکړه.
امریکایي لوري چینایان د غونډې له پروتوکول څخه په سرغړونه ملامته کړل او دواړو لوریو د کمرو مخې ته پر یوه بل تورونه پورې کړل.
په داسې غونډو کې چې په پيل کې یې ملاحظات تر څو دقیقو نه زیاتیږي، د خبریالانو مخې ته تر یوه ساعت زیات دوام وکړ او دواړو خواوو په ښکاره په بې ساري ډول د یوه بل پر سیاستونو نیوکې وکړې.
د امریکا د بهرنیو چارو وزیر انتوني بلېنکن په خپلو افتتاحیه خبرو کې وویل چې د چین اقدامات هغه اصولو ته ګواښ دی چې نړیوال ثبات خوندي کوي.
انتوني بلېنکن دا هم وویل چې متحدایالاتونه د سینکیانګ په ګډون د چین یو لړ اقداماتو ته ژورې اندېښنې لري چې بحثونه به پرې وکړي.
واشنګتن چین په سینکیانګ کې د اویغور مسلمانانو په نسل وژنه تورن کړی دی.
ښاغلي بلېنکن نورو اختلافي مسایلو ته هم اشاره وکړه او ویې ویل چې متحد ایالاتونه غواړي چې د هانګ کانګ، تایوان، سایبري حملو او د امریکا پر متحدانو د اقتصادي فشارونو د راوړلو پر موضوعاتو هم بحثونه وکړي.
بلېنکن زیاته کړه چې د بایډن اداره له خپلو متحدانو سره د چین په داخل او خارج کې د دغه هېواد د مخ په زیاتیدونکي استبداد پر وړاندې یو لاس ده.
چین د کمونېست ګوند د جګ پوړي ډیپلومات، یانګ جیچي او د بهرنیو چارو د وزیر وانګ یي له لوري دې څرګندونو ته په قهر ځواب ورکړ او ویې ویل، چین په خپله خاوره کې د امریکا له مداخلې سره مخالف دی.
وانګ یې خبرداری ورکړ چې د داسې مداخلې په اړه مو خپل سخت مخالفت څرګند کړی دی او د دې پر ضد به سخت اقدامات وکړو.
وانګ یې امریکا تورنه کړه چې په خپل هېواد کې د بشري حقونو د ستونزو په حل کې پاتې راغلې ده او په نوره نړۍ کې دي د خپلې دې ډیموکراسۍ له پرمختګونو لاس واخلي.