امریکا د ماشوم عسکرو مخنیوي قانون کې د پاکستان نوم شامل کړی
په دې فهرست کې د شموليت په نتيجه کې پر پاکستان د نړيوالو لخوا د پوځي مرستو بنديز لګېدلای شي او د ملګرو ملتونو لخوا د امن ساتلو په پوځي مهمونو کې هم برخه نه شي اخیستلای.
دا قا نون په ۲۰۰۸ز کال کې د امریکا پخواني ولسمشر جارج ډبليو بوش لاسليک کړی وو چې له مخه يې د اتلسو کالو نه کم عمره ماشومان په پوليسو،امنيتي او دفاعي ځواکونو او حکومت پلوه وسله والو ډلو کې نه شي بهرتي کېدلای شي.
د ماشوم عسکرو مخنیوي قانون (ايکټ)د انساني قاچاق د مخنيوي په تړاو د کلني راپور خپرېدو ته اړتیا لري چې هغه هېوادونه پکې شامل شي چې د ۲۰۲۰ز کال د اپريل میاشتې له لومړۍ نېټې تر ۲۰۲۱ز کال د مارچ تر ۳۱مې يې ماشوم سرتيري د خپلو ځواکونو په ليکو کې شامل کړي وي او یا يې د خپل پلوي په توګه کارولي وي.
د ۲۰۲۱ز کال د ماشوم عسکرو مخنیوي قانون په فهرست کې د پاکستان او ترکي په شمول افغانستان، برما،کانګو، ايران، عراق، ليبیا، مالي، نايجيریا، صوماليه، جنوبي سوډان، شام، وېنزوېلا او يمن شامل دي.
کانګو، صوماليه او يمن هغه هېوادونه دي چې له ۲۰۱۰ز کال راهیسې هر کال يې په دغه فهرست کې نومونه راځي خو دا لومړی ځل دی چې پاکستان او ترکي په دغه فهرست کې شامل کړل شوي دي.
د ماشوم عسکرو مخنیوي قانون په فهرست کې شامل هېوادونه د امریکا لخوا د نړيوالو ځواکونو لپاره په تعليمي زده کړو او روزنیز پروګرامونو کې هم برخه نه شي اخستلای او د هغو هېوادونو له پوځ سره په مالي مرستو هم بنديز وي. له دې علاوه دا هېوادونه د پوځي استعمال لپاره د سامانونو اخيستو اجازتنامې هم نه شي تر لاسه کولای.
د راپور له مخې دغه بندیزونه به د ۲۰۲۱ز کال اکتوبر له لومړۍ نېټې نه عملي کېږي او تر ۲۰۲۲ز کال پورې به جاري وي خو هغه هېوادونه چې د امریکا ولسمشر يې له دې بنديزونو نه مستثنی وګرځوي، له هغوی سره به دا مرستې جاري وي.
په دې راپور کې د بهرنيو هېوادونو د نومونو شاملولو فيصله د مختلفو سرچينو، د امریکايي حکومتي چارواکو لخوا د براه راست مشاهدې او څېړنو، د ملګرو ملتونو د ادارو، د نړيوالو مدني فعالانو د اعتباري ډلو او د مقامي او بهرنيو رسنیو د راپورونو په بنیاد کېږي.