امریکا د طالبانو د نوې کابینې په اړه اندېښنه ښودلې
د امریکا د بهرنیو چارو وزارت پرون چهارشنبه (د وږي په ۱۷مه) په کابل کې د طالبانو له لوري د نوي حکومت د اعلان پر وړاندې په غبرګون کې وویل چې د نوې کابینې غړي یا طالبان دي او یا هم د طالبانو نژدې ملګري او ښځې هم په کې نه شته.
د بهرنیو چارو وزارت په بیان کې راغلي دي چې متحدایالات همدا راز د کابینې د ځینو غړو د پیوندونو او سوابقو له پلوه هم اندېښنه لري، خو بیان پرته له دې چې د کوم ځانګړي کس نوم یاد کړي زیاتوي چې که څه هم د طالبانو کابینه سرپرسته ده خو امریکا به د طالبانو د خبرو نه بلکې د عمل په اساس په دې برخه کې قضاوت وکړي.
په بیان کې دا یادونه هم شوې چې متحدو ایالاتونو مخکې خپله دا تمه څرګنده کړې ده چې د افغانستان خلک د یوه ټول شموله حکومت مستحق دي.
د نړیوال بحران ډلې د افغانستان د نوي حکومت د ترکیب په اړه اندېښنه ښودلې.
د دې ډلې یوه سلاکار ابراهیم باهیس ویلي چې په ۳۳ کسیزه کابینه کې ډېری پښتانه او یوازې دوه تاجکان او یو ازبک غړیتوب لري.
د طالبانو ویاند ذبیح الله مجاهد پرون د نوې کابینې د اعلان پر مهال وویل چې دوی دا کابینه د قوم په اساس نه بلکې د اهلیت په اساس غوره کړې ده.