په مري کې د واورو توپانونه؛ د بندو سلګونه سیلانیانو د ژغورنې عملیات روان دي
دا سیلانیان په مري کې د سختې یخنۍ له کبله بند پاته دي او درانه تلفات هم لري.
د راپورونو له مخې په دې پېښه کې د یوې کورنۍ د اتو غړو په ګډون ټول ۲۲ کسان مړه شوي دي.
د پنجاب اعلی وزیر عثمان بزدار پرون پر ټویټر لیکلي دي چې په مري کې بندې پاتې ټولې کورنۍ دولتي ودانیو او هوټلونو ته رسول شوې دي.
د پاکستان د ژغورنې ادارې پرون وویل چې په قربانیانو کې لس ماشومان، دوه مېرمنې او لس نارینه شامل دي.
د اسلام اباد د پولیسو د یوه چارواکي د کورنۍ اووه غړي هم په دې ډله کې دي.
چارواکو پرون وویل، د پېښې قربانیان د شپې په اوږدو کې په خپلو موټرو کې پاتې وو.
د دوی په وینا ډېری کسان د وجود د تودوخې د کمېدو له کبله مړه شوي دي.