روسیه له قازقستانه خپل دوه زره کسیزه ځواک بیرته وربولي
روسیې ویلي دي چې له قازقستانه خپل هغه ۲۰۰۰ کسیزه ځواک باسي، چې دغلته یې د قهرجنو مظاهرو پس د امنیت ساتلو لپاره لېږلی ول.
دا ځواکونه د روسیې په مشرۍ د ګډ امنیت تړون تر چوکاټ لاندې په قازقستان کې وګومارل شول. په دغه هېواد کې د انرژۍ اوخاصکار د مایع ګېس په سرکاري نرخ کې دوه چنده زیاتولي له خواشینۍ ډک پراخ ولسي لاریونونه راپارول.
د روسیې خبري اژانسونو تر مخه د روسیې د دفاع وزارت نن (جنوري ۱۳) په یو بیان کې ویلي دي چې ځواکونه یې له قازقستانه راوتلو ته تیاری نیسې.
د ګډ امنیت تړون یا سي اېس ټي او د جنورۍ په دولسمه په یو بیان کې وویل چې له قازقستانه د ځواکونو په راایستلو کې به لس ورځې ولګي.
روسیه ددې سازمان مشري کوي او بېلاروس، قازقستان، قرغزستان، ارمنییا او تاجکستان یې نور غړي هېوادونه دي.
د ګډ امنیت تړون ځواکونه تېره اونۍ هغه وخت قازقستان ته ورسېدل چې ولسمشر قاسم جمارت تقایېف په هېواد کې بیړنی حالت اعلان کړ او د مظاهره چیانو د مخنیوي لپاره یې له سازمانه د پوځي امداد خواست وکړ. په مظاهرو کې د وژل شویو کسانو کره شمېره لا نه ده جوته خو د سرکاري شمېرو تر مخه د تشدد په پېښو کې ۱۶۴ کسان وژل شوي او په سلګونه نور ټپیان شوي دي.