ملګري ملتونو: شمالي کوریا د اټومي او بالیستیک توغندیو جوړولو ته دوام ورکړی
د ملګرو ملتونو متخصصانو په یوه راپور کې ویلي چې شمالي کوریا د اټومي او بالیستیک توغندیو جوړولو ته دوام ورکړی دی.
دوی په خبره، شمالي کوریا د امنیت شورا د پرېکړه لیکونو پر خلاف، خپل د اټومي موادو د تولید ظرفیت هم زیات کړی دی.
د ملګرو ملتونو متخصصانو د خپل یوه مهم راپور په لنډیز کې چې اسوشېټېډ پرېس اژانس وايي د شنبې ناوخته یې ترلاسه کړی ویلي، په جنورۍ میاشت کې د شمالي کوریا له خوا د نویو، لنډ واټنه او احتمالاً منځ واټنه میزایلو د ازمویلو بهېر «د پام وړ چټک» روان و چې هم د بالیستیک توغندیو له ټکنالوژۍ او هم یې له جامد او مایع سون توکو په کې کار اخیستی دی.
شمالي کوریا په جنورۍ میاشت کې نهه توغندي او نورې وسلې وتوغولې چې دا د ریکارډ تر سطحې زیاتې توغونې ګڼل شوې دي.