"پاکستان ورځ" ولمانځل شوه
د پاکستان ورځې په مناسبت د دې هېواد ولسمشر او وزيراعظم په ولس غږ کړی چې د ټولنیزې او اقتصادي پرمختيا لپاره په ګډه کار وکړي.
په دې موقع د هر کال په شان د مارچ په ۲۳مه، د پاکستان پوځ په اسلام اباد کې په يو لړ مراسمو کې د وسلو ښودنه وکړه. په دې وسلو کې ميزايل او ټينکونه شامل وو. پر دې ورځ د پاکستان هوايي ځواکونو پيلوټانو کرتبونه هم وښودل. په دې مراسمو کې د نړۍ د ځينو هېوادونو استازو هم ګډون کړی وو.
د پاکستان ولسمشر عارف علوي دې غونډې ته په خبرو کې وويل چې د قوم په نوم یې پېغام دا دی چې هېواد ته د ورپېښو معاشي او نورو چېلنجونو مخنيوی په اجتماعي کوششونو کېدای شي. هغه زیاته کړه چې د خودمختارۍ لپاره اتحاد او اتفاق ضروري دی.
په دې مراسمو کې د پاکستان وزيراعظم عمران خان هم خبرې وکړي. هغه خپل دا سياسي دريځ تکرار کړ چې وايي پخوانيو حکومتونو د ملي ګټو پرځای شخصي ګټو ته لومړيتوب ورکړی وو چې له وجې يې د پاکستان اقتصاد کمزوری دی.
د نوموړي د دې تازه څرګندونو په اړه پخوانيو واکمنو سیاسي ګوندونو (مسلم لېګ (ن) او پيپلز پارټي) څه نه دې ويلي خو په پخوا وختونو کې یې ورته ادعاوې رد کړې او د تحريک انصاف حکومت پاليسۍ يې د وروسته پاتېوالي سبب بللي دي.