پنجشېر کې طالبانو د مقاومت جبهې له لوري د ځینو سیمو نیول رد کړل
په پنجشیر کې د طالبانو امنیه قوماندان مولوي داد محمد بتار د مقاومت د ملي جبهې دا ادعا رد کړه چې په پنجشېر ولایت کې یې ځینې سیمې نیولې دي.
مولوي بتار وایي، چې پرون مازدیګر مخالفانو په ځینو سیمو کې ډزې وکړې بیا بېرته د غرونو څوکو ته په شا شول.
بل لور ته د ملي مقاومت جبهې ویاند صبغت اله احمدي پر ټویټر لیکلي دي، چې د دوی وسله والو د پنجشېر په ابشار ولسوالي کې دیارلس طالبان وژلي دي او د دې ولسوالي له مرکز پرته یې نورې سیمې نیولې دي.
دی همداراز ادعا کوي، چې د عبداله خېل دره یې له طالبانو تصفیه کړې ده.