لویدیځ هېوادونه له افغان پناه غوښتونکو سره په تبعیضي چلند تورن شول
بشري حقونو د څار د سازمان یوه چارواکي لویدیځ هېوادونه له افغان پناه غوښتونکو سره په تبعیضي چلند تورن کړل.
د بشري حقونو د څار د سازمان اجراییه رییس کینیت رات وايي، چې لویدیځ او په خاص ډول اروپايي هېوادونو، د اوکرایني کډوالو پرتله له افغانانو سره ډېر توپیري چلند وکړ.
له افغانانو سره د اروپايي هېوادونو پر توپیري چلند له دې مخکې هم د بشري حقونو فعالانو انتقادونه کړي وو، خو ښاغلي رات پرون په یوه انلاین بحث کې د اروپايي هېوادونو دا کار له اسلام څخه وېره او نژادي توپیر وباله.
هغه زیاته کړه: "یوه لویه او ښکاره استثنا د اوکرایني کډوالو په برخه کې وه چې د میلیونونو په شمېر کې اروپا ته ننوتل. اروپا دروازې ورته پرانیستې، په پراخه ټنډه یې هرکلی ورته ووایه او سمدستي یې ځای پرځای کړل. تاسو د اوکرایني کډوالو کمپونه نه وینئ، دوی د خلکو په کورونو او نورو ځایونو کې دېره شول. خو په ډېر ښکاره توپیر سره ښکاري چې اروپایانو نه یوازې افغانانو بلکې د سوریې، اریتریا، سوډان او نورو هېوادونو کډوالو ته څه ډول هرکلی ووایه. زه فکر کوم چې د دوی دې کار ته پرته له دې چې له اسلام څخه وېره او نژادي توپیر ووایو بله مناسبه کلمه نه شته."
په بېګاني آنلاین بحث کې د افغانستان په پخواني دولت کې د بشري حقونو د خپلواک کمېسیون مشرې شهرزاد اکبر هم خبرې وکړې.
مېرمن اکبر د هغو افغانانو د ستونزو یادونه وکړه، چې له افغانستانه وتلي خو اوس بې برخلیکه د سیمې په هېوادونو کې پراته دي.
اکبر زیاته کړه: "د اوکراین وضعیت د افغانانو لپاره دا خبره ور یادوي چې د مشارکت هغه ګډ احساس چې دلته و، او دا تمه وه چې له هغو کسانو سره به مرسته وشي چې د دې هېوادونو د هڅو مستقیم ملاتړ یې کړی یو هم عملي نه شول. ما ته هره ورځ د هغو خلکو پیغامونه رارسېږي چې په ډېرو سختو شرایطو کې او له یوه قانوني برخلیک پرته د سیمې په هېوادونو کې اوسېږي."
د ۲۰۲۱ کال په اګست میاشت کې په کابل کې د جمهوري نظام له سقوط وروسته لسګونه زره افغانان بهر ته کډوال شول.
ځینې دا افغانان د امریکا او متحدانو په مرسته یې خوندي ځایونو ته بیول شوي دي خو زرګونه نور چې د نړیوالو له مرستې پرته په انفرادي ډول اروپايي هېوادونو ته رسېدلي دي، اوسمهال بې برخلیکه پاتې دي او د ژوند له سختو شرایطو سره لاس ګرېوان دي، خو د روان کال په فبروري میاشت کې پر اوکراین د روسیې له یرغل وروسته اروپايي هېوادو سلګونه زره اوکرایني کډوالو ته په خپلو قلمروونو کې د ژوند نسبي ښه امکانات برابر کړل.