ويانا کې امريکا او ايران د اټومي تړون د بيا احيا په اړه مذاکره کوي
د امریکا او ایران لوړ پوړي مذاکره کوونکي ویانا ته ځي ترڅو د ایران او نړۍ د قدرتونو ترمنځ د ۲۰۱۵ کال د اټومي تړون د بیا احیا په اړه خبرې پیل کړي.
د ایران لپاره د امریکا ځانګړي استازي رابرټ میلي پرون وویل چې په همدې هدف ویانا ته روان دی او هېواد یې په ښه نیت یوې هوکړې ته د رسېدو لېوال دی.
هغه زیاته کړه دا به ډېر ژر روښانه شي چې ایا ایران هم دا ډول هدف لري که نه.
د ایراني پلاوي مشر مرکچي علي باقري کني، هم ویانا ته تللی دی.
ټاکل شوې چې خبرې نن بیا پیل شي.