هرات کې طالبانو هغه کس نيولی چې خپله مور يې پلورلې
په هرات کې د طالبانو د حکومت امنیه قومانداني وايي، یو تن یې په دې تور نیولی چې خپله مور یې په څلور نیم لکه افغانۍ پلورلې وه.
دې قوماندانۍ پرون (پنجشنبې) په یوه خبرپاڼه کې ویلي چې نیول شوي کس د دوو نورو کسانو په همکارۍ نکاح شوې ښځه پلورلې وه.
په خبرپاڼه کې دا هم راغلي چې نیول شویو کسانو پر خپلو تورونو اعتراف کړی دی.
د طالبانو له واک ته رسېدو او د بې روزګارۍ او لوږې له زیاتېدو وروسته په ځلونو د ماشومانو په تېره بیا د کم عمره نجونو د پلورلو خبرونه خپاره شوي خو دا لومړی ځل دی چې د یو چا له لوري د خپلې مور د پلورلو ادعا کېږي.