طالبان د کابل- کندهار د لویې لارې د بیا رغونې د پیل خبر ورکوي
د طالبانو د حکومت د ټولګټو چارو وزارت د کابل- کندهار د لویې لارې د بیا رغونې د پیل خبر ورکوي.
د افغانستان ملي راډیو تلوېزیون پر خپله رسمي ټویټر پاڼه دا خبر خپور کړی او وايي چې د کابل کندهار د لویې لارې د بیارغونې چارې د میدان وردګو ولایت له دراني بازار څخه د غزني تر مرکزه پورې پرون د وږي په ۲۶مه پیل شوې.
د ټولګټو چارو وزارت د معلوماتو له مخې دا اتیا کیلومتر سړک د ۴۰۰ میلیون افغانیو په لګښت رغول کېږي او چارې به یې په ۹ میاشتو کې بشپړې شي.
د کابل کندهار لویه لاره د پخواني حکومت پرضد د طالبانو د جګړو پرمهال د سړک د غاړې بمونو، موټربمونو او بمباریو له کبله ډېره زیانمنه شوې ده.