د آسیا د فوټبال جام سیالۍ؛ نن د افغانستان او فلیپین ټیمونه لوبه لري
د آسیايي ملتونو له شل کلنو د کم عمره ځوانانو د فوټبال جام ته د غوراوي د لوبو په لړۍ کې نن د افغانستان او فلیپین ټیمونو سیالي سره کوي.
د افغانستان د فوټبال د فدراسیون ویاند فیروز مشعوف د نننۍ لوبې په اړه آزادۍ راډیو ته وویل: "په ټوله کې فکر کوم یو ښه فرصت لرو. د عمان په لوبه کې له بریا وروسته زموږ د لوبډلې ښه چمتووالي اولوړې روحیې ته په پام سره که وکولای شو چې سبا فلیپین ته ماتې ورکړو، د آسیايي ملتونو له شل کلنو د کم عمره ځوانانو جام ته د غوراوي لپاره ډېر زیات چانس لرو."
افغان لوبدلې د جمعې ورځې په ماښام د کوربه هېواد عمان لوبډلې د صفر پر وړاندې په یوه ګول سره ماتې ورکړه.
افغان لوبډله په دې لړۍ کې د ټایلنډ، عمان او فلیپین له سیالو لوبډلو سره په یوه ګروپ کې لوبې کوي.