طالبانو پنجشېر کې د مقاومت جبهې د وژل شوي قوماندان او ملګرو د جسدونو انتقال ته اجازه ورکړې
د طالبانو په وړاندې په پنجشېر کې د ملي مقاومت د جبهې د یوه وژل شوي قومندان کورنۍ او ځایي خلک وایي چې طالبانو ورته اجازه ورکړې چې د هغه او ورسره د وژل شویو ملګرو مړي له شاوخوا یوې میاشتې وروسته له غره راکوز او خاورو ته یې وسپاري.
د یار محمد په نوم د دغه قومندان کورنۍ او د پنجشېر د خنج ولسوالۍ اوسېدونکو ازادي راډیو ته ویلي چې، د وژل شویو کسانو مړي راکوز کړای شوي او نن به خاورو ته وسپارل شي.
ویل کېږي چې یار محمد له خپلو دوو زامنو او پنځو ملګرو سره یوه میاشت مخکې په خنج ولسوالۍ کې په غره کې اسیر شوي او په ډزو وژل شوي دي.
په ټولنیزو رسنیو کې د دې پېښې ویډیوګانو د بشري حقونو ډلو سخت غبرګونونه را پارولي او هغه یې غندلي وه.
طالبانو دا رد کړې چې د مقاومت د ملي جبهې یو شمېر وسلهوال غړي دې د دوی د ځواکونو لهخوا په ډزو وژل شوي وي او د دفاع وزارت یې ویلي چې په دې اړه څېړنه کوي.