د بدلون لپاره د افغان ښځو ایتلاف د نجونو پر لوړو زده کړو بندیز وغانده
![د بدلون لپاره د افغان ښځو ایتلاف د نجونو پر لوړو زده کړو بندیز وغانده](https://gdb.rferl.org/058a0000-0aff-0242-8d73-08dae34381e1_w800_h450.jpg)
د بدلون لپاره د افغان ښځو د ایتلاف په نوم یوې ډلې د یوې اعلامیې په خپرولو سره د نجونو پر لوړو زده کړو د طالبانو له لوري لګول شوی بندیز په کلکو ټکو غندلی.
د بدلون لپاره د افغان ښځو د ایتلاف وایي، په افغانستان کې د ښځو او نجونو پر وړاندې د طالبانو دا او دې ته ورته نور اقدامات د دې ښکارندویي کوي چې طالبان په قصدي او سیستماتیکه توګه د جنسیتي توپیر د پالیسیو پر اساس ښځې له خپلې هستۍ څخه محوه کوي.
دغه ایتلاف چې وایي، د ۲۰۲۲ کال په جولای میاشت کې رامنځته شوی او د پخواني حکومت، د افغانستان د پخوانۍ ملي شورا او د مدني ټولنې د مشرانو او رسنیو په ګډون یو شمېر څېرې په کې راغونډ شوي، پر نړیوالې ټولنې هم غږ کړی چې تر امنیتي اندېښنو ور هاخوا له طالبانو سره تعامل وکړي څو د افغان مېرمنو او نجونو ژور او غمیز حالت درک کړي.