طالبانو له نړۍ د تعامل او رسميت پېژندنې غوښتنه کړې
د طالبانو د رئیس الوزرا سیاسي مرستیال عبدالکبیر د یوناما له مشرې سره کتنه کې ویلي، د دوی اوسنی حکومت له نړیوالو سره تعامل غواړي.
دا کتنه چې پرون شوې پهکې مولوي عبدالکبیر ټینګار کړی چې، ملګري ملتونه باید د دوی په اوسني رژیم او چارواکو یې محدودیتونه او بندیزونه لېرې کړي، ځکه د ده له قوله، دې کار د تعامل مخه نیولې ده.
د طالبانو د رئیس الوزرا له دفتره خپره شوې خبرپاڼه کې زیاته شوې، مولوي عبدالکبیر همدا ډول یو ځل بیا غوښتي چې د طالبانو اوسنی رژیم دې په رسمیت وپېژندل شي، ځکه په خبره یې، د رسمیت پېژندنې لپاره یې ټول شرایط پوره کړي دي.
په افغانستان کې د ملګرو ملتونو سیاسي استازولۍ یا یوناما د دې لیدنې په اړه هیڅ ډول معلومات نهدي خپاره کړي.
له کله چې طالبان په افغانستان بیا واکمن شوي، هیڅ هېواد یې حکومت په رسمیت نهدی پېژندلی، خو طالبانو ته د مشروعیت ورکولو لپاره یې خپل شرایط روښانه کړي.
نړیوالې ټولنې له طالبانو غوښتي چې یو همهشموله حکومت جوړ کړي، د افغانانو په ځانګړي ډول د نجونو او ښځو بشري حقونو ته درناوی وکړي او د نجونو د ښوونځيو او پوهنتونونو د پرانستو په ګډون په دوی لګېدلي ټول بندیزونه سملاسي لېرې کړي.
هغه شرایط چې طالبانو له دوی یو هم نهدی عملی کړی او وايي، دا د دوی کورني مسایل دي او نړیوالو ته پهکې د لاسوهنې اجازه نه ورکوي.
خو په کور دننه هم افغانان هره ورځ د طالبانو لهخوا د دوی پر وړاندې په روان چلند نیوکه کوي او وايي، طالبان د دې پر ځای چې د خلکو غږ واوري، پر دوی خپل غوښتنې په زور مني.
د سیاسي مسایلو کارپوه سمیع یوسفزی هم وايي، طالبان هغه مهال له نړۍ سره تعامل کولای شي چې له دیکتاتوري ډوله کارونو تېر شي.
نوموړی وايي: "یو مطلق دیکتاتوري ډوله نظام یې جوړ کړی دی. د خلکو په نیولو، د ویسا په نیولو، د مېرمنو په نیولو، له خلکو د ژوند د بنیادي حق اخستو سره، فکر نهکوم چې نړیواله دې له دوی سره تعامل ته تیاره شي. خپله طالبان هم د دې وړتیا لري چې نهلري چې په ځان کې داسې بدلون راولي چې له مخې یې نړیواله ټولنه دوی په رسمیت وپېژني."
د دې تر خوا یو شمېر نور مسایل هم شته چې طالبان یې له نړیوالې ټولنې سره ټکر کې واقع کړي دي.
له دې شمېر یوه بله جنجالي موضوع د افغانستان هوايي حریم دی، هغه چې طالبان وايي، د امریکا لهخوا نقضيږي.
د طالبانو د ملي دفاع وزارت لوی درستیز فصیحالدین فطرت د دوی د حکومت تر کنټرول لاندې ملي ټلوېزیون سره خپله نوې مرکه کې ویلي، له کله چې دوی واک ته رسېدلي، د امریکا متحدهایالاتو د افغانستان هوايي حریم په ځلونو نقض کړی دی.
نوموړي ويلي: "که څه هم هغوی ژمنه کړې وه او د دوحې د هوکړې یوه برخه هم ده، خو بیا هم د افغانستان هوايي حریم په ځلونو د امریکایانو لهخوا نقض شوی دی. امریکايي لوری مو جریان کې کړی، خو بیا هم په ځلونو نقضېږي."
د امریکا متحدهایالاتو جمهور رئیس جو بایډن له افغانستانه د خپلو عسکرو له ویستو وروسته په ځلونو ویلي، په سیمه کې به هغه توان وساتي چې وشي کولای په افغانستان کې د ترهګرۍ راپورته کېدونکی ګواښ وځپي.
هغه خبره چې د تېر کال د اګسټ په لومړۍ نېټه عملي هم شوه او د امریکا جمهور رئیس جو بایډن اعلان وکړ چې د بېپیلوټه الوتکې په برید کې یې په کابل کې مېشت د القاعده مشر ایمن الظواهري وژلی دی.