د ګجرات او کلکتې جالبه لوبه؛ د راشدخان هېټریک او د رینکو سینګ ۵ شپږیزې
دغه سیالي چې د هندوستان په احمداباد ښار کې ترسره شوه، د ګجرات لوبډلمشر راشدخان پچه وګټله او توپوهنه یې غوره کړه.
یادې لوبډلې د ویجی شنکر د نیمه سلیزې پر مټ د ۲۰۵ منډو هدف وټاکه.
د کلکتې لوبډلې په پیل کې د رحمن الله ګربز په ګډون خپل دوه لوبغاړي ژر له لاسه ورکړل، خو لوبډلمشر نتیش رانا او وینکتیش ایر د لوبې په منځنیو اورونو کې ښه لوبه وکړه. ایر نیمه سلیزه ووهله.
ګربز په دې لوبه کې یوازې ۱۵ منډې وکړې.
راشدخان د لوبې ۱۷م اور ترسره کړ، دا وخت کلکتې ته په ۲۴ توپونو د ۵۰ مندو اړتیا وه.
خان په لومړني، دویم او درېیم توپ پرله پسې د انډري رسل، سونیل نارین او شردول ټاکور ویکټې وسوځولې.
نوموړی لومړنی افغان توپ اچونکی شو چې په آی پي ایل لیګ کې په خپل نوم هېټریک ثبتوي.
د دې سیالۍ په وروستي اور کې کلکتې ته د ۲۸ منډو اړتیا وه، د یادې لوبډلې توپوهونکي رینکو سینګ په ۵ توپونو پینځه شپږیزې ووهلې او دا سیالي یې وګټله.
نوموړی د دې سیالۍ غوره لوبغاړی هم ونومول شو.
د ویلو ده چې دا د کلکتې دویمه بریا او د ګجرات لومړنۍ ماتې وه.