ّځینې پخواني افغان چارواکي او شنونکي: پاکستان د افغان نجونو د زدهکړو مخه نیسي
د ملي امنیت پخوانی رییس او د ړنګ شوي جمهوري نظام د سولې د مذاکراتي ټیم مشر محمد معصوم ستانکزی ادعا کوي چې د جمعیت علمای اسلام پاکستان یوه پلاوي کابل او کندهار ته سفرونه کړي او طالب چارواکو ته یې مشوره ورکړې چې که ښځو ته د زدهکړو اجازه ورکړي، د ده په خبره تباه به شي.
ستانکزي د کوم سند له وړاندې کولو پرته د یکشنبې په ورځ په خپله ایکسپاڼه کې لیکلي چې د پاکستان د جمعیت علمای اسلام ګوند د یوه جګپوړي غړي صلاح الدین ایوبي په مشرۍ د درې کسیز پلاوي دغه سفر افغانستان ته د اسلامي همکاري، د سازمان د پلاوي له سفر سره هممهاله ترسره شوی او ډېره کړې يې ده چې، بايد د دې 'منافقتونو' مخه ونيول شي.
خو د پاکستان جمعیت علمای اسلام، دا ادعا رد کړې او ويلي چې دوى د نجونو د زده کړو مخالف نه دي
د جمعيت علمای اسلام وياند مولانا حافظ حمد الله د يادو ادعاو په اړه ازادي راډيو ته وويل دوى کله هم د طالبانو حکومت ته مشوره نه ده ورکړې چې د نجونو ښوونځي او پوهنتونه وتړئ.
هغه زیاته کړې: "جمعیت علمای اسلام پاکستان او ټوله نړۍ کې د ښځو د تعلیم ملاتړ کوي. افغانستان کې یې د ښځو او نجونو د تعلیم د تعطیل مشوره نهده ورکړې، بلکې د هغوی د ښوونځیو او پوهنتونو د پرانیستلو سپارښتنه یې کړې ده."
مولانا فضل رحمان د جمعیت علمای پاکستان مشر دی چې د طالبانو د حکومت ملاتړی بلل کېږي او د طالبانو د "معنوي پلار" په نوم شهرت لري.
د اسلامي همکاریو د سازمان پلاوي په دې وروستیو کې افغانستان ته سفر کړی او د طالبانو د حکومت له یو شمېر چارواکو سره یې په کتنه کې له هغوی غوښتي چې د زدهکړو حق باید له هیچا نه واخیستل شي او ټینګار یې کړی چې د اسلامي لارښوونو سره سم زدهکړه پر نارينهو او ښځينهو لازمي ده.
د دغه سازمان په اعلاميه کې، چې د وږي په شپږمه خپره شوې، راغلي چې د پوهنې سرپرست وزير مولوي حبيب الله اغا او د طالبانو د حکومت د لوړو زدهکړو وزارت سرپرست مولوي ندا محمد نديم ورته په ځواب کې ويلي چې دوى پر ارزونو بوخت دي او کله چې د نجونو لپاره خوندي چاپیریال برابر شي، دوی ته به د زدهکړو حق ورکړل شي.
په ورته وخت کې یو شمېر کارپوهان هم په دې باور دي، تر هغه چې پاکستان په افغانستان کې د نجونو د زدهکړو اجازه ورنهکړي، په دې برخه کې هڅې بې ګټې دي.
يو له دغو کارپوهانو احمد سعيدي ازادي راډيو سره خبرو کې داسې ادعا وکړه.
هغه وویل: "د اسلامي همکاریو د پلاوي سفر بې ګټې دی، ځکه چې پاکستان او د هغه هېواد دیني عالمان په افغانستان کې د نجونو د ښوونځیو د تړلو پاتې کېدو پلويان دي، کله چې پاکستان د ښوونځیو د خلاصولو امر وکړي، هغه وخت امکان لري."
بل سیاسي کارپوه ډاکټر صلاح الدین سعیدي ازادي راډيو ته وویل، د طالبانو مشرتابه وېره لري چې نجونو ته د زدهکړو په اجازه ورکولو سره به په پاکستان کې د خپلو یو شمېر پلویانو ملاتړ له لاسه ورکړي.
نوموړي ازادي راډيو ته وويل: "هغه څه چې د طالبانو حکومت له منبر څخه وايي، دا هماغه منبر چې په پاکستان کې د طالبانو او د هغوی د متحدینو پر ذهن او فکر حاکم دی، هغه څوک چې د جمهوري ریاست په نسکورېدو کې یې مستقیمه ونډه درلوده، له نظري پلوه، ایا د طالبانو مشرتابه به په ورته عمل سره خپل ملاتړ له لاسه ورکړي؟ او د طالبانو رهبري له هغوی وېره لري."
د ازادي راډیو خبریال وغوښتل چې د دې ادعاو په اړه د طالبانو د حکومت د ویاند د مرستیال بلال کریمي نظر هم واخلي، خو بریالی نهشو.
دا ادعاوې په داسې حال کې کېږي چې تېر کال د افغانستان پخواني ولسمشر حامد کرزي هم ادعا کړې وه چې په افغانستان کې تر شپږم ټولګي پورته د نجونو زدهکړې د پاکستان په امر بندې شوې دي.
په تېرو دوو کلونو کې په افغانستان کې د طالبانو د بياځلي واکمنۍ له پيله تر شپږم ټولګي پورته نجونې ښوونځيو ته د تللو اجازه نهلري او د تېر کال له ډسمبر مياشتې راهيسې پوهنتونونو ته د نجونو پر ورتګ هم بنديز لګېدلی دی.