د یوناما پر دفتر په ډزو کې یو طالب وژل شوی او د دې دفتر یو کارکوونکی ټپي شوی
د یوناما مطبوعاتي دفتر ازادي راډیو ته تایید کړې چې پېښه یکشنبه له غرمې وروسته د ملګرو ملتونو په یوه دفتر کې چې د کابل د ختیځ پلچرخي سیمې ته نږدې موقعیت لرې رامنځته شوې ده.
د یوناما په بیان کې دا هم راغلي چې د طالبانو یو غړی د ملګرو ملتونو له محوطې دباندې مړ موندل شوی دی.
په دې اړه چې دا طالب وسله وال څنګه مړ شوی څه نه دي راغلي خو یوناما لیکلي چې د دوی ساتونکو د طالبانو په عسکرو باندې ډزې نه دي کړي.
د پېښې انګیزه او علت هم نه دی روښانه شوی.
د طالبانو د کورنیو چارو وزارت ویاند عبدالمتین قانع هم له رسنیو په خبرو کې دا پېښه تایید کړې ده.
هغه ویلي چې د ملګرو ملتونو په دفتر کې د ډزو په نتیجه کې د طالبانو یو سرتیری وژل شوی او د یوناما یو کارکوونکی برسېرن ټپي دی.
قانع هم ویلي چې د دې پېښې په اړه څېړنې روانې دي.
پېښه د ملګرو ملتونو د یو ان او سي اې په نوم په یوه مرکز شوې چې پکې د ملګرو ملتونو د مرستندویه ماموریت یوناما دفتر، د ملګرو ملتونو د څو نورو څانګو، اړوندو بنسټونو او پروګرامونو دفترونه موقعیت لري. همدارنګه دغه مرکز کې د ملګرو ملتونو نړیوال کارکوونکي هم هستوګن دي.
ملګرو ملتونو ویلي چې دوی او واکمن چارواکي ( د طالبانو حکومت ) په دې اړه څېړنې کوي.
تر دې پېښې وروسته د یوناما په خبره واکمنو چارواکو ( طالبانو ) د ملګرو ملتونو د یاد مرکز دننه او دباندې ټول فعالیتونه د لنډ وخت لپاره درولي وو.
اوس د دې مرکز فعالیتونه بېرته پیل شوي.