KQZ-ja fton për respektim të masave mbrojtëse ndaj COVID-19

Komisioni Qendror i Zgjedhjeve (KQZ) ka konfirmuar të dielën se të gjitha qendrat e votimit janë hapur me kohë në komunën e Podujevës dhe atë të Mitrovicës Veriore.


Në të dyja këto qytete po mbahen zgjedhjet e jashtëzakonshme për kryetar komune.


Mandati i kryetarëve të rinj do të jetë deri në zgjedhjet e ardhshme lokale më 2021.


KQZ-ja ka kërkuar respektim të masave mbrojtëse ndaj COVID-19, sëmundjes që e shkakton koronavirusi i ri.


“Sipas raportimeve nga Komisionet Komunale Zgjedhore nga këto dy komuna të gjitha qendrat e votimit janë hapur në kohën e planifikuar dhe të rregulluar me ligj. Në emër të KQZ-së kërkojmë mirëkuptimin e qytetarëve në zbatimin e masave mbrojtëse sipas rekomandimeve të institucioneve shëndetësore”, deklaroi zëdhënësi i KQZ-së, Valmir Elezi.




Në garë për të parin e Podujevës janë Nexhmi Rudari nga Lidhja Demokratike e Kosovës, Shpejtim Bulliqi nga Lëvizja Vetëvendosje dhe Naim Fetahu nga Partia Demokratike e Kosovës.


Zgjedhjet në Podujevë, ishin paraparë të mbaheshin më 15 mars, por për shkak të përhapjes së koronavirusit, ky proces u pamundësua.


Për dallim prej Podujevës, në Mitrovicën e Veriut garojnë katër kandidatë për kryetar komune.


Erden Atiq nga Lëvizja Vetëvedosje, Millan Radojeviq nga Lista Serbe, Florent Azemi nga Partia Demokratike e Kosovës dhe Dushan Millunoviq, i cili është kandidat i pavarur.


Podujeva mbeti pa kryetar pasi Agim Veliu u emërua Ministër i Punëve të Brendshme në qeverinë e udhëhequr nga ish-kryeministri Albin Kurti.


Kurse Mitrovica e Veriut mbeti pa kryetar më datën 3 qershor, kur u votua Qeveria e re e Kosovës, e udhëhequr nga Avdullah Hoti.


Ish-kryetari i Mitrovicës së Veriut, Goran Rakiq, mori dy pozita, atë të zëvendëskryeministrit dhe mori në udhëheqje Ministrinë e Pushtetit Lokal.


Rakiq ishte kryetar i Mitrovicës së Veriut për dy mandate.