Президент: Дар Тоҷикистон 1,2 миллион нафар бо оби пок таъмин шуданд
Эмомалӣ Раҳмон дар суханронии худ ба мудирияти дуруст ва пайдо кардани роҳҳалҳои муассиру корсози тақсими захираҳои об таъкид кард. Вай бори дигар ёдовар шуд, ки Тоҷикистон ба унвони кишвари захираҳои об дар давоми чандин даҳсолаи асри 20 аз беш аз 1000 пирях тақрибан 30 дарсадашро аз даст дод.
Обшавии босуръати пиряхҳоро донишмандон ба ҷараёни гармоиши иқлим рабт медиҳанд. Ба гуфтаи президент, “танҳо пиряхи бузургтарини қитъавии Федченко дар ин муддат ба андозаи як километр хурд шуда, масоҳати он то 11 километри мураббаъ кам гардид ва ҳаҷми яхи худро беш аз 2 километри мукааб аз даст дод”. Вазъи баамаломада хатари обхезиву офатҳои табииро сол то сол афзоиш медиҳад.
Ба унвони намунаи мусбати кор дар самти мудирияти об, президенти Тоҷикистон ба ҳамкории наздики давлат ва бахши хусусӣ ишора кард ва гуфт, Тоҷикистон дар 15 соли охир "барои ҳалли масоили дастрасӣ ба обу беҳдошт қариб як миллиард доллари амрикоӣ сарф кардааст. Дар натиҷа ҳукумат дар панҷ соли охир дастрасии тақрибан 1,2 миллион нафарро ба оби ошомидании босифат ва 600 ҳазор нафарро ба оби ошомидании бехатар таъмин гардонид”.
Бар тибқи таҳқиқоти ЮНИСЕФ – дафтари СММ дар умури кӯдакон, ки чанд соли пеш анҷом шудааст, беш аз 40 дарсади Тоҷикистон ба оби поки ошомиданӣ дастрасӣ надорад.
22 март дар бинои СММ иҷлосияи 72-юми Маҷмаи кулли СММ ба муносибати оғози Даҳсолаи байналмилалии амал “Об барои рушди устувор, солҳои 2018-2028” баргузор шуд, ки ташаббускори он президенти Тоҷикистон аст.