Аввалин сафари нахуствазири Покистон Имрон Хон ба Афғонистон
Рӯзи 19-уми ноябр Имрон Хон, нахуствазири Покистон бо як сафари нодири якрӯза ба Кобул парвоз мекунад. Радио “Машъал” хабар медиҳад, ки аз замони сари кор омаданаш ба мақоми нахуствазирӣ аввалин бор аст, ки Имрон Хон аз Афғонистони ҳамсоя дидан мекунад. Дар изҳороти вазорати хориҷаи Покистон рӯзи чоршанбе гуфта шуд, ки Имрон Хон бо даъвати президенти Афғонистон Ашраф Ғанӣ ба Кобул сафар мекунад. Дар ин сафар дар баробари мулоқоту гуфтугӯҳо бо Ғанӣ, қарор аст масоили ҳамкориҳои тиҷоратӣ, ҷараёни сулҳ, рушди иқтисодии минтақа ва иртиботу ҳамкории миёни мақомоти Афғонистону Покистон баррасӣ шавад.
Ду раҳбар моҳи маи соли гузашта дар ҳошияи Созмони конфронси исломӣ дар Арабистони Саудӣ дидору гуфтугӯ карда буданд ва як моҳ баъдаш Ғанӣ ба Покистон сафар анҷом дод. Ду кишвар соли 2010 созишномаи тиҷоратии интиқоли бору молро имзо кардаанд ва дар остонаи сафари нахуствазири Покистон ба Кобул мушовири тиҷоратии Хон – Раззоқ Довуд ба Кобул рафта масоили тиҷорату самоягузориро бо мақомдорони афғон баррасӣ намуд.