Фавти яке аз осебдидагони сӯхтор дар бозори "Фаровон"-и Бохтар
Гуфта мешавад, ки Маҳмадӣ Сангови 50-сола сокини шаҳри Кӯлоб буда, дар бозори "Фаровон" дӯкон доштааст ва вақти баровардани бораш, балони газ кафида осеб дидааст.
Бозор шаби 1-уми июн оташ гирифт ва дар натиҷа 12 нафар осеб дида, соҳибкорони зиёде пулу дӯкону маҳсулоти худро аз даст доданд.
Вазорати корҳои дохилии Тоҷикистон шоми 2-юми июн гуфт, сӯхтор ба далели "расиши кӯтоҳи ноқилӽо дар яке аз ошхонаҳои бозор" сар задааст. Қаблан баъзе аз шоҳидон фарзияи "оташ гирифтани балонҳои гази моеъ"-ро гуфта буданд. Айни замон Вазорати корҳои дохилӣ гуфтааст, ҳодисаро "пурра санҷиш мекунанд".
Бозори “Фаровон” дар маркази Бохтар бори аввал нест, ки оташ мегирад. Дар гузашта ҳам ин бозор ба сабаби риоят нашудани меъёрҳои амниятӣ як дафъа сӯхт ва садҳо соҳибкору тоҷир зиён дидаву муфлис шуданд.
Оташ гирифтани бозорҳо дар гӯшаҳои гуногуни Тоҷикистон солҳои охир зиёд иттифоқ меуфтад. Мақомот дар чанд ҳолат гуфтанд, ки риоя накардани қоидаҳои бехатарӣ сабаби оташ гирифтани бозорҳо шудааст, аммо дар ҳама ҳолат ҷуброни зиёни расида ба соҳибкорон ва барқарор кардани тиҷорати онҳо аз масъалаҳои баҳсбарангез мондааст.
Тоҷирон дар баъзе маврид ҳолатҳои барқасдона оташ зада шудани бозорҳоро аз эҳтимол дур намедонанд.