Берун бурдани доллари нақдина аз Қирғизистон маҳдуд шуд
Тибқи қарор, акнун шаҳрвандони хориҷӣ ҳақ надоранд, аз Қирғизистон беш аз 5 ҳазор доллари нақдинаро берун баранд. Барои шаҳрвандони худи Қирғизистон берун бурдани то 10 ҳазор доллари нақдина иҷозат дода шудааст.
Ба Кумитаи амнияти миллӣ ва ниҳодҳои дахлдори дигари Қирғизистон дастур дода шудааст, ки аз интиқоли ғайриқонунии долларҳои нақдина ба хориҷ пешгирӣ намоянд.
Ахиран вакили порлумони Қирғизистон Жусупбек Коргонбой уулу аз камбуди доллари нақд дар Қирғизистон хабар дода буд. Ба гуфтаи вай, ҳаннотон миқдори зиёди рубли русиро вориди Қирғизистон мекунанд ва аз ин ҷо долларро ба Туркия, Русия, Чин ва дигар кишварҳо мебаранд.
Пештар раиси Бонки миллии он кишвар Кубаничбек Боконтаев низ дар яке аз ҷаласаҳои порлумон гуфта буд, долларро бо халта ба Русия мебаранд.