Portugaliýada “Ýewrowideniýäniň” final tapgyry geçýär
Portugaliýanyň paýtagty Lisbonda “Ýewrowideniýe” aýdym-saz bäsleşiginiň final tapgyry geçýär.
Şenbe güni geçýän bu çärä 26 ýurduň, şol sanda Ukrainanyň, Serbiýanyň we Moldowanyň sungat işgärleri hem gatnaşýarlar.
Geçen ýyl Kiýewde geçirilen “Ýewrowideniýede” portugaliýaly aýdymçy Salwadar Sobralyň ýeňiş gazanandygy sebäpli, bu ýylky bäsleşik Portugaliýada geçiriler.
“Ýewrowideniýe” ilkinji gezek 1956-njy ýylda geçirilipdi. Bäsleşigiň maksady 2-nji Jahan urşundan soň Ýewropany birleşdirmekdi.
Şu günki gün bu bäsleşige dünýä boýunça 200 million çemesi adam tomaşa edýär.