Putiniň metbugat wekiliniň gyzy Ýewropa Parlamentinde işleýär
Russiýanyň prezidenti Wladimir Putiniň metbugat wekiliniň gyzy Ýewropa Parlamentiniň Brýusseldäki edarasynda iş tejribesini geçýär. Bu barada Azatlyk Radiosyna belli boldy.
Dmitriý Peskowyň 21 ýaşly gyzy Ýelizaweta Peskowa Ýewropa Parlamentiniň fransiýaly agzasy Emirik Şopardyň (Aymeric Chauprade) garamagynda tejribe geçýär. Bellesek, Şopard Russiýanyň 2014-nji ýylda Krym ýarymadasyny basyp almagyny açyk goldapdy.
Peskowanyň ady Şopardyň Ýewropa Parlamentindäki web-sahypasynda agzalýar. Şopardyň özi hem Azatlyk Radiosy bilen söhbetdeşliginde Peskowanyň öz toparynyň düzüminde işleýändigini tassyklady.
“Hanym Peskowa, gürrüňsiz, Russiýa Federasiýasyndaky möhüm şahsyýetiň gyzydyr. Emma, talyp hökmünde, onuň beýleki iş tejribesini geçýän ýaş adamlardan artykmaç ygtyýarlygy ýokdur” diýip, Şopard e-meýl arkaly jogap berdi.
Mundanam başga, Şopard Peskowanyň Russiýanyň ne hökümet, ne-de şahsy pudagynda işleýändigini sözüne goşdy.