ABŞ, “Talyban” owgan parahatçylyk gepleşikleriniň nobatdaky tapgyryny geçirýärler
ABŞ-nyň we “Talyban” toparynyň wekilleri Katarda Owganystandaky dowam edýän 18 ýyllyk urşy tamamlamak ugrundaky gepleşikleriň nobatdaky tapgyryna başladylar.
ABŞ resmileriniň we “Talyban” toparynyň metbugat wekiliniň maglumatyna görä, gepleşikleriň 9-njy tapgyry 22-nji awgustda Kataryň paýtagty Dohada başlanypdyr.
Associated Press agentliginiň maglumatyna görä, jeňçi topary bilen gepleşiklere ýolbaşçylyk edýän ABŞ-nyň ýörite wekili Zalmaý Halilzad 21-nji awgustda “Talybanyň” esasy araçysy Molla Abdul Ghani Baradar bilen ikiçäk duşuşyk geçiripdir.
Mundan ozalky gepleşiklerde ABŞ-nyň güýçleriniň Owganystandan çykarylmagy, ok atyşyklaryň bes edilmegi, Owganara dialogyň ýola goýulmagy ýaly meseler maslahat edilipdi.
“Talyban” häzire çenli owgan hökümetiniň wekilleri bilen gönümel gepleşikleri geçirmekden ýüz öwrüp gelýär.