ABŞ Hytaýda geçiriljek owganara gepleşiklerini gowy garşy aldy
Bu barada Birleşen Ştatlaryň, Russiýanyň, Hytaýyň we Pakistanyň hökümetleriniň 28-nji oktýabrda bilelikde ýaýradan beýanatynda aýdylýar. Bu ýurtlaryň resmileri geçen hepde Moskwada ýygnaklary geçiripdiler.
24-25-nji oktýabrda Russiýada geçirilen ýygnaklarda Birleşen Ştatlara Waşingtonyň Owganystan boýunça ýörite wekili Zalmaý Halilzad wekilçilik edipdi. Şonda dört ýurt özleriniň “hemmetaraplaýyn we durnukly ylalaşyga” goldaw bildirýändiklerini ýene bir gezek mälim etdiler.
Olar “Hytaýyň owganara duşuşygynyň nobatdaky tapgyryny Pekinde geçirmek baradaky teklibini gowy garşy aldylar” diýlip, beýanatda aýdylýar.
Beýanata görä, gepleşiklere “ýokary derejeli syýasy şahslaryň, şol sanda Owganystan Yslam Respublikasynyň hökümet resmileriniň, beýleki owgan liderleriniň we Talybanyň wekilleriniň” gatnaşmagyna garaşylýar.
Owganara gepleşikleriniň iň soňkusy şu ýylyň iýul aýynda Kataryň paýtagty Dohada geçirilipdi.