Kabulda ýarylan awtoulag bombasy azyndan sekiz adamy öldürdi
Owganystanyň Içeri işler ministrligi paýtagt Kabulda partladylan awtoulag bombasynyň azyndan sekiz adamy öldürip, ondan gowrak adamy ýaralandygyny habar berdi.
20-nji dekabrdaky bomba hüjüminde parlament agzasy Han Muhammad Wardagy alyp barýan ulag kerweni nyşana alyndy. Wardak ýaralandy.
"Terrorçylar Kabul şäherinde terrorçylykly hüjümi amala aşyrdy. Gynansak-da, sekiz watandaşymyz öldürildi, 15-den gowrak adam ýaralandy" diýip, Içeri işler ministrliginiň metbugat wekili Tarik Arian aýtdy.
Hüjümiň jogapkärçiligini häzirlikçe hiç bir topar öz üstüne almady.
“Talyban” bilen owgan hökümetiniň gepleşik geçirip, onlarça ýyl bäri dowam edýän söweşleri soňlajak parahatçylyk şertnamasyny baglaşmaga synanyşmagy bilen, soňky aýlarda Owganystanda bolýan zorlukly wakalar has-da güreldi.
Ýurduň dürli künjeklerinde yzygiderli çaknyşyk bolýar, Kabula garşy bomba we raketa hüjümleri gurnalýar. 15-nji dekabrda Kabulda bolan bomba partlamasy we atyşyk netijesinde azyndan üç adam, şol sanda welaýat häkiminiň orunbasary öldürildi.