Orsýetiň we Hytaýyň ýolbaşçylygyndaky howpsuzlyk guramalary Owganystany maslahatlaşýar

Russiýanyň we Hytaýyň ýolbaşçylygyndaky iki sany sebitara howpsuzlyk guramasy şu hepde, “Talyban” häkimiýeti ele geçirenden bir aý soň, Owganystandaky ýagdaýy ara alyp maslahatlaşmak üçin täjik paýtagtynda aýry-aýry duşuşyk geçirmäge taýýarlanýar.


ABŞ-nyň Owganystandaky 20 ýyllyk harby missiýasynyň aýagynda Kabulyň günbatar tarapyndan goldanýan hökümetiniň birden çagşamagy netijesinde, Moskwa bilen Pekiniň sebitde esasy oýunçylara öwrülmek synanyşyklarynyň arasynda, Kollektiw howpsuzlyk şertnamasy guramasynyň (KHŞG) 16-njy sentýabrda geçirýän ýygnagynyň yzyndan, bir gün soň, Şanhaý hyzmatdaşlyk guramasynyň (ŞHG) ýygnagy geçiriler.


Iki topar hem Moskwanyň we Pekiniň ABŞ-nyň bu sebitdäki geosyýasy agalygyna garşy durmagy bilen baglanyşdyrylýar.


“Talybanyň” häkimiýeti ele geçirmegi bilen, Owganystan süýşüp gelýän uly gumanitar krizis bilen ýüzbe-ýüz boldy we, Owganystanyň Merkezi Aziýadaky goňşulary uruşdan tozan ýurtdan abanýan howp-hatarlarlardan, on müňlerçe bosgunyň serhetden aşmak ähtimallydygyndan ätiýaç edýärler.


Russiýanyň prezidenti Wladimir Putin we KHŞG ýurtlary bolan Ermenistanyň, Belarusyň, Gazagystanyň, Gyrgyzystanyň we Täjigistanyň liderleri Duşenbede diplomatik gepleşiklere başlaýar.


KHŞG-nyň baş sekretary Stanislaw Zas 15-nji sentýabrda geçirilen mejlisde Täjigistan-Owganystan serhedindäki ýagdaýyň "amatsyzdygyny" boýun aldy we Duşanbäniň günortadan abanyp biljek ähli howpa garşy durup bilmegi üçin "ähli zerur harby we harby-tehniki kömek" bilen üpjün ediljekdigini aýtdy.


Howpsuzlyk toparlanyşygy soňky hepdelerde bolup biljek kynçylyklara taýýarlyk görmek üçin Gyrgyzystanda harby türgenleşik geçirdi.