Pakistan owgan ýagdaýy kadalaşýança TOPH taslamasyny goýbolsun edýär
TOPH (Türkmenistan-Owganystan-Pakistan-Hindistan) gaz geçiriji taslamasynyň durmuşa geçirilmegi Owganystandaky ýagdaý durnuklaşýança togtadyldy diýip, Pakistanyň ykdysadyýet ministri Omar Aýub Han 25-nji noýabrda TASS habar gullugyna aýtdy.
Türkmenistan "Talyban" awgustda Owganystandaky häkimiýeti ele geçireli bäri söweşiji toparyň ýolbaşçylary bilen goňşy ýurduň üstünden geçiriljek geçiriji taslamalary barada ençeme gezek maslahat etdi. Talyban wekilleriniň yzygiderli tassyklamagyna görä, olar TOPH taslamasyna we beýleki hyzmatdaşlyk tekliplerine özleriniň gyzyklanma bildirýändiklerini aýtdylar.
Türkmenistanyň daşary işler ministri we wise-premýer Reşit Meredowyň ýolbaşçylygyndaky wekiliýet oktýabr aýaynyň aýagynda Kabula sapar edip, talyp hökümetiniň wekilleri bilen duşuşdy we, resmi habarlara görä, iki tarapyň gepleşiklerinde esasy orun TOPH geçirijisiniň gurluşygynyň amala aşyrylmagy bilen bagly boldy.
TASS habar gullugynyň pakistan ministrine salgylanyp ýazmagyna görä, "TOPH, şeýle-de CASA-1000 ýaly taslamalar (Gyrgyzystandan we Täjigistandan Owganystana we Pakistana elektrik energiýasyny geçirmek tagallalary bilen bagly) üstünde alnyp barylýan işler, Owganystandaky ýagdaý sebäpli togtadyldy.
"Bizde bar bolan maglumatlara görä, häzirki wagtda Owganystanda bu we beýleki taslamalar boýunça iş alnyp barylmaýar, köp adam ewakuasiýa edildi, Owganystanda indi Bütindünýä bankynyň wekilçiligi ýok; ýagdaýlar durnuklaşandan soň, gurluşyk meselelerine gaýtadan dolanyp bileris" diýip, Omar Aýub Han TASS bilen söhbetdeşlikde aýdypdyr.
Şu aralykda, türkmen tarapy bilen gepleşik geçirýän talyp resmileriniň Aşgabatdan gürrüňi edilýän taslamalar babatynda maliýe kömegini almaga çalyşýandygy görünýär.
"Tolonews" habarlar gullugy maglumatyna görä, 20-nji noýabrda Owganystanyň günbataryndaky Hyrat welaýatynda türkmen ilçisi Hoja Öwezow we beýleki resmiler “Talyban” hökümetiniň dag-magdanlar we nebit ministriniň ýerine ýetirijisi Mohammad Isa bilen duşuşdy.
Maslahatyň dowamynda TOPH gaz eçirijisi, şeýle-de beýleki “bilelikdäki ykdysady” taslamalar barada pikir alyşyldy diýip, habarda aýdylýar.
“Eger-de siz bize serişde berseňiz, bu TOPH taslamasynyň, optiki süýümli geçirijileriň we demirýollaryň ýoluny açar” diýip, talyban ministri Mohammad Isa öz hökümetiniň maliýe zerurlyklaryny dile getirdi.
Türkmen ilçisi bu taslamalaryň durmuşa geçmegi üçin bar bolan meseleleri aradan aýyrmak boýunça iki ýurduň arasynda birnäçe komitetiň esaslandyrylandygyny aýtdy. Emma ol gürrüňi edilýän meseleleri anyklaşdyrmady, şeýle-de Türkmenistanyň bu taslamalar üçin Owganystana maliýe serişdelerini berip-bermejekdigini aýtmady.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.