Özbegistan CPJ wekilini ýurda goýbermekden ýüz öwrüp, soň pikirini üýtgetdi

Özbegistanyň immigrasiýa gullugy ikinji gün irden, immigrasiýa ulgamynyň onuň ýurda girmegine rugsat bermeýändigini görkezendigini aýdyp, žurnalistleri goraýan hökümetden aýry guramanyň (CPJ) Ýewropa we Merkezi Aziýa maksatnamasynyň utgaşdyryjysy Gulnoza Saidiň ýurda girmegine rugsat bermedi.


Düýbi Nýu-Ýorkda ýerleşýän gurama bu habary 30-njy awgustda öz web sahypasynda çap etdi.


Said Daşkent howa menzilinde takmynan bäş sagat saklandy, häkimiýetler onuň 1-nji sentýabrda Nýu-Ýorka uçýança şol ýerde galmalydygyny aýtdylar.


Žurnalistleri goramak baradaky komitetiň maglumatyna görä, şol günüň agşamy oňa Özbegistana girmek üçin rugsat berildi. Häkimiýetler onuň ilki ýurda goýberilmezliginiň sebäplerini düşündirmediler.


Özbek metbugatynyň maglumatyna görä, Milli köpçülikleýin habar beriş serişdelerine goldaw we ösüş gaznasy ikinji gün Özbegistana girmegi we çykmagy düzgünleşdirýän döwlet edaralaryna haýyş bilen ýüz tutdy.


"Alnan maglumata görä, mesele çözüldi we Gulnoza Saide ýurda girmek rugsady berildi" diýip, gaznada aýtdylar.