Çeşme: Türkmenistan daşary ýurt uçar gatnawlaryny artdyrmagy, karantin düzgünini ýatyrmagy planlaşdyrýar
Türkmenistan öňümizdäki aýdan başlap pandemiýa çäklendirmeleri sebäpli daşary ýurtlarda galan raýatlaryny yzyna getirmek üçin uçar gatnawlaryny artdyrmagy, şeýle-de ýurda dolananlar üçin hökmany karantin düzgünini ýatyrmagy göz öňünde tutýar. Bu barada Azatlyga ozal hem ygtybarly maglumatlary beren çeşmesi habar berýär.
Türkmen häkimiýetleriniň mundan iki ýyl ozal koronawirus aladalarynyň arasynda türkmen raýatlarynyň has köpdügi bellenilýän ýurtlary, şol sanda Türkiýe ugry boýunça ýatyran dowamly uçar gatnawlaryny ýola goýmaýandygy sebäpli, müňlerçe türkmenistanly henizem daşary ýurtlarda agyr şertlerde galmaly bolýar.
“Türkmen häkimiýetleri 5-nji oktýabrdan başlap daşary ýurtlardan, şol sanda Türkiýeden has köp uçarlary gurnamagy planlaşdyrýarlar. Göz öňünde tutulýan uçar gatnawlarynyň sany entek doly aýdyň däl, emma indi daşary ýurtdan gelýän uçarlary diňe bir Lebabyň ýa Balkanyň aeroportlary däl, eýse beýleki sebitleriň howa menzilleriniň hem kabul edip başlamagy mümkin. Ýöne bu entek doly belli däl” diýip, howpsuzlyk aladalary sebäpli şahsyýetini aýan etmezligi soran çeşmämiz 26-njy sentýabrda gürrüň berdi.
Azatlyk şu aýyň başynda Türkmenistanyň esasy uçar habyna öwrülen Türkmenabadyň Halkara aeroportuna daşary ýurtlardan gelýän artdyrylan çarter uçarlarynyň aglabasyny kabul etmek tabşyrylandygyny, emma ýerli hünärmenleriň, kadr ýetmezçiligi sebäpli, munuň üstünlikli durmuşa geçirilip bilinjekdigine şübhe bildirýändikleri barada habar beripdi.
Galyberse-de, çeşmämiz 5-nji oktýabrdan başlap daşary ýurtdan gelýänler üçin karantin düzgüniniň hem doly ýatyrylýandygyny belledi. Ýatlatsak häzir Türkiýe, Belarus, Özbegistan we Täjigistan döwletlerinden çarter uçarlary bilen gelýän raýatlar karantinde 3 gün galmaly bolýarlar. Şol bir wagtda, dowamly uçar gatnawlary ýola goýlan Moskwa, Kazan, Frankfurt we Dubaý ugurlary bilen gelýän raýatlaryň öý şertlerinde özlerini üzňeleşdirmek soralýar.
“[Türkmenistanyň esasy] Türkmenabatdaky karantin zolagyna 2-nji oktýabrda Stambuldan geljek raýatlar ýerleşdirilip, ondan soňra bu hökmany düzgün ýatyrylar. Emma şonda-da daşary ýurtlardan gelýän raýatlar 120 manat töläp, covid testinden geçmeli bolarlar. Mundan başga-da, daşardan gelen ýolagçylaryň bedenleri mümkin maýmyn mama infeskiýasyna barlanar” diýip, çeşmämiz sözüne goşdy.
Pandemiýanyň başyndan bäri öz serhet çäklerinde koronawirusyň hasaba alynmandygyny öňe sürýän türkmen häkimiýetlerinden, şol sanda Saglyk ministrliginden ýokarky ýagdaýlar boýunça aýdyňlaşdyryjy goşmaça maglumat almak başartmady.
Türkmenistanyň ýatyrylan uçar gatnawlaryny ýola goýmaýandygy sebäpli, hususanda Türkiýedäki türkmen raýatlarynyň tomsuň aýagyna köpçülikleýin protest çärelerini geçirmeginden soň, türkmen häkimiýetleri çarter uçarlarynyň sanyny artdyrdy.
Emma eýýäm iki ýyldan hem aşa wagt bäri daşary ýurtlarda galýan türkmen raýatlary, isleg bildirýänleriň has köpdügi sebäpli, çarter uçarlarynyň sanawyna ençeme aýlap ýazylyp bilmeýändiklerini, şeýle-de munuň üçin para soralýan ýagdaýlaryň hem seýrek däldigini aýdýarlar.
Türkmenistanyň Türkiýede galan raýatlaryny yzyna getirmek tagallalaryny atdyrmagy, şol sanda Ankaranyň, Aşgabadyň ýüzlenmesi esasynda, türkmenistanlylar üçin wiza düzgünini ornaşdyran döwrüne gabat geldi. Azatlyk mundan soň, Türkiýedäki bikanun türkmen migrantlaryny ele salmak tagallalarynyň ýygjamlaşdyrylandygy we olaryň gysga wagtyň, ýagny birnäçe günüň içinde yzyna deportasiýa edilýändigi barada habar beripdi.
Ozal türkmen raýatlary Türkiýä 30 gün möhletlik wizasyz syýahat edip bilen bolsalar, indi azyndan resmi ýagdaýda 225 dollar pul çykaryp, wiza üçin ýüz tutmaly bolarlar. Şol bir wagtda, hökümetçi neşirler talap edilen resminamalaryň tabşyrylmagynyň wiza beriljekdigini kepillendirmeýändigini, “Ýüzlenme wagtynda gijikdirilen ýa-da ret edilen halatynda” wiza ýa-da hyzmat tölegleriniň hem yzyna gaýtarylmaýandygyny duýdurýarlar.
Türkmenistanyň Daşary işler ministrligi türkmen tarapynyň wiza haýyşyny Türkmenistanyň raýatlarynyň “Türkiýe respublikasynda bolmaklary bilen bagly düzgünleri kämilleşdirmek we ulgamlaýyn esasda alyp barmak maksady bilen” diýip esaslandyrdy.
Ýöne synçylar we aktiwistler Türkmenistanyň Türkiýe döwletinden eden haýyşyny öz raýatlarynyň halkara hereketini mundan-da beýläk çäklendirmek synanyşygy bilen baglanyşdyrýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.