Aşgabatda 'Innowasiýa tehnologiýalary' žurnaly çykarylar
Türkmenistanyň Ylymlar akademiýasynyň Tehnologiýalar merkezinde täze žurnal neşir ediler.
“Türkmenistanda innowasiýa tehnologiýalary” ady bilen çärýekde bir gezek çykaryljak ylmy-amaly neşir elektron görnüşde okyjylara ýetiriler.
Internet neşiriň sahypalarynda ylmyň hem-de tehnikanyň iň täze gazananlary, olaryň önümçilige ornaşdyrylyşy, ylym we tehnika ulgamynda täze usullar barada maglumat berler diýip, döwlet eýeçiligindäki metbugat habar berýär.
Žurnalyň wezipesi ýaş alymlary, olaryň açyşlaryny goldamaga we ýurduň ylym, tehnika ulgamyndaky täzeçillik ösüşini üpjün etmäge gönükdirilen diýip, habarda bellenýär.
Türkmenistan, ýurtdaky ýapyklyk, internet çäklendirmeleri, ilatyň durmuş derejesiniň aşak gaçmagy sebäpli, dünýädäki täzelikleri durmuşa we önümçilige ornaşdyrmakda kynçylyk çekýän ýurtlaryň biri hasaplanýar.