Gyrgyzystanyň öňki prezidenti türmeden boşap, bejergi üçin Ispaniýa uçdy
Gyrgyzystanyň öňki prezidenti Almazbek Atambaýew, türmeden boşadylanyndan soň, 15-nji fewralda bejergi almak üçin Ispaniýa gitdi diýip, Jogorku geňeşiň ozalky deputaty Asel Koduranowa Azatlyk radiosynyň Gyrgyz gullugyna habar berdi.
Onuň sözlerine görä, Atambaýew bejergi alanyndan soň Gyrgyzystana dolanyp gelmekçi bolýar.
“Biz häzirlikçe onuň Ispaniýada näçe wagt galjakdygyny bilemzok, sebäbi türmede bolan 3,5 vyl wagtynda onuň saglyk problemasy ýüze çykdy. Oňa operasiýa edilmegi hem gaty ähtimal. Ýöne onuň Gyrgyzystana gaýdyp geljegi anyk" diýip, Koduranowa aýtdy.
Ýokary kazyýetiň 13-nji fewralda geçirilen ýapyk mejlisi öňki prezidentiň aklawçylarynyň täze açylan ýagdaýlar sebäpli Batukaýewiň türmeden boşadylmagy bilen bagly jenaýat işine seredilmegini dikeltmek baradaky haýyşyny kanagaylandyrdy.
Ýokary kazyýetiň 2021-nji ýylyň 12-nji oktýabrynda we 2022-nji ýylyň 15-nji martynda Atambaýewe garşy çykaran kararlary ýatyryldy.
Mundan başga, Bişkegiň Birinji maý etrap kazyýeti 14-nji fewralda Atambaýewiň bejergi almak üçin ýurt daşyna gitmegine rugsat berdi.
Şeýlelikde, Atambaýew türme tussaglygyndan boşadyldy.
Almazbek Atambaýew 2011-2017-nji ýyllarda Gyrgyz Respublikasynyň prezidenti bolup işledi we birnäçe jenaýat işinde günäkärlenýär.